QR Kásipodaqtar federatsiiasy prezident sailaýyna eks-depýtat Amangeldi Taspihovtyń kandidatýrasyn usyndy, dep habarlaidy Sputnik Qazaqstan.
Kásipodaqtar federatsiiasynyń atqarý komitetiniń otyrysynda eki úmitker usynyldy. Biraq onyń biri, federatsiia tóraǵasynyń orynbasary Muhtar Tinikeev prezidenttike sailaýǵa qatysýdan óz erkimen bas tartqan.
"Meni úmitker retinde usynýǵa negiz joq, óitkeni meniń qazaq tilimniń deńgeii oǵan múmkindik bermeidi ", - dedi Tinikeev jiynda.
Amangeldi Taspihov kim?
Amangeldi Taspihov 1959 jyly 20 qarashada Batys Qazaqstan oblysynda dúniege kelgen. Negizgi mamandyǵy – injener-mehanik. 1998-2002 jyldary parlament senatynyń depýtaty, 2004-2007 jyldary májilis depýtaty boldy. Keiin Batys Qazaqstan oblystyq máslihatynyń depýtaty qyzmetin atqardy. Qazir ol Batys Qazaqstan oblystyq aýmaqtyq kásipodaqtar birlestiginiń tóraǵasy.
Qazaqstan prezidenttigine úmitkerler
Aita ketsek, birinshi bolyp "Uly Dala qyrandary" respýblikalyq qozǵalysy prezidentikke jazýshy, jýrnalist Sádibek Túgeldiń kandidatýrasyn usynǵan bolatyn. Al 23 sáýirde ótken "Nur Otan" partiiasynyń kezekten tys XIX sezinde qazirgi Prezident Qasym-Jomart Toqaevtyń bilik partiiasy atynan sailaýǵa túsetini belgili boldy.
Basqa da saiasi partiialar birinen soń biri prezidenttikke kandidattaryn usyna bastaidy. "Aq jol" partiiasynyń sezi 24 sáýirde ótse, "Aýyl" halyqtyq-demokratiialyq partiiasy 25 sáýirde jinalady. Qazaqstannyń kommýnistik halyq partiiasynyń delegattary 26 sáýirde bas qosady. Al "Birlik" partiiasy ýaqyt tapshylyǵyna bailanysty sailaýǵa qatysýdan bas tartty.
Kezekten tys prezident sailaýy
Qazaqstan Prezidenti Qasym-Jomart Toqaev 9 sáýirde el halqyna úndeý jasap, elde kezekten tys prezident sailaýy ótetinin jariialady. Memleket basshysy sailaýdy 2019 jyldyń 9 maýsymyna belgiledi.
Prezidenttikke kandidattardy usyný 28 sáýir saǵat 18:00-ge deiin jalǵasady. Úmitkerlerdi elimizde tirkelgen saiasi partiialar men respýblikalyq qoǵamdyq birlestikter usyna alady. Ár kandidat 118 140 senimdi sailaýshynyń qolyn jinaýy tiis. Kandidattardy tirkeý 11 mamyrǵa deiin jalǵasady.
Kezekten tys prezident sailaýyna úkimet rezervinen 9,4 milliard teńge bólinetin boldy. Qarjynyń negizgi bóligi respýblika boiynsha qurylatyn 10 myń sailaý ýchaskesiniń jumysyn uiymdastyrýǵa baǵyttalmaq.
Kandidattarǵa qoiylatyn talaptar
Prezidenttikke kandidat týmysynan Qazaqstan azamaty, qyryq jasqa tolǵan, memlekettik tildi meńgergen, sońǵy 15 jyl boiy Qazaqstanda turatyn jáne joǵary bilimi bar respýblika azamaty bolýy tiis.
Buǵan qosa, prezident bolyp sailaný úshin azamattyń memlekettik qyzmette nemese sailanbaly memlekettik laýazymdarda keminde 5 jyl jumys tájiribesi, sondai-aq belsendi sailaý quqyǵy bolýy tiis.
Sondai-aq, Qazaqstan prezidenttigine usynylatyn kandidattar 107 túrli júike dertine tekseriledi.
