Almatyda sot eks-bankir Jomart Ertaevty qamaý merzimin uzartty, dep habarlaidy "Ult aqparat" qalalyq sottyń baspasóz qyzmetine silteme jasap.
Mamandandyrylǵan aýdanaralyq tergeý sotynyń qaýlysymen Jomart Ertaev 15 tamyzǵa deiin qamaýda otyratyn boldy.
Munyń aldynda habarlaǵanymyzdai, QR Bas prokýratýrasynyń tergeý operativtik tobynyń basshysy sotqa deiingi tergeý jumystarynyń aiaqtalmaýyna bailanysty sot merzimin keiinge shegerý týraly sotqa ótinish túsirgen bolatyn. Sot tergeý toby basshysynyń ótinishin qanaǵattandyrdy.
Qazaqstan biligi Jomart Ertaevty "qazaqstandyq Bank RBK direktorlar keńesi tóraǵasynyń keńesshisi bolǵan kezinde bankten jalǵan firmanyń atyna 80 million dollardan astam qaryz alyp berýge jáne ony qaitarmaýǵa kómektesken" dep aiyptaidy.
Buǵan deiin prokýratýra Ertaevpen birge bul is boiynsha 54 azamat "qarjy jymqyrýǵa qatysy bar" degen kúdikke ilingeni týraly habarlaǵan. Onyń 41-i – banktiń top-menedjeri men qyzmetkeri.
Byltyr mamyrda reseilik BAQ-ta jariialanǵan úndeýde Ertaev Bank RBK-da eshqashan jumys istemegenin, ol banktiń shtatynda jáne aktsionerleri quramynda bolmaǵanyn málimdegen. Reseilik "Kommersant" gazeti Jomart Ertaevtyń sotta Reseiden saiasi baspana men sol eldiń azamattyǵyn suraǵanyn habarlaǵan. Ol "saiasi astarmen qýdalaýǵa túskenin" aitqan.
Qańtardyń basynda Resei aqparat quraldary Máskeý qalalyq soty Jomart Ertaevty Qazaqstanǵa ekstraditsiialaý týraly sheshim shyǵarǵanyn habarlaǵan.
Jomart Ertaev buǵan deiin Qazaqstanda bank zańyn buzǵan degen aiyppen qylmystyq jaýapqa tartylǵan. 2009 jyly Qazaqstan qarjy politsiiasy Alians Banktiń aktsionerleri men menedjerlerine bir milliard dollardan kóp aqshany urlaǵan degen aiyp taqqan. Sol kezde ustalyp, tutqyndalǵan Jomart Ertaev toǵyz ai qamaýda otyrǵan. Keiin oǵan taǵylǵan aiyp "býhgalterlik jáne qarjy esebi týraly zańdy buzý" jáne "bank qarjysyn zańsyz paidalaný" degen baptarǵa aýystyrylǵan.
Sot Ertaevqa aiyppul salyp, bostandyqqa shyǵarǵannan keiin ol Qazaqstandaǵy ekinshi deńgeili basqa bankterde jumys istegen. Al 2014 jyldyń sońynda Jomart Ertaev "Alma TV" kompaniiasy basshylyǵyna taǵaiyndalǵan bolatyn.
