Bári búrkitshilikke tánti ataqty amerikalyq rejisser Otto Belldiń izraildik fotograf Asher Svidenski túsirgen Aisholpannyń sýretin kórgen kezden bastalypty. Sol sátte oǵan Aisholpan týraly filmniń ideiasy keledi.
Eki jylǵa sozylǵan jumys aiaqtalyp, Otto Bell «Búrkitshi qyz» (The Eagle Huntress) derekti filmin qazan aiynda kópshiliktiń nazaryna usyndy. Film Niý-Iork pen Los-Andjeles kinoteatrlarynda 28 qazannan kórsetile bastady. Bir jarym saǵattyq týyndy aǵylshynsha jáne keiipkerlerdiń sózi sýbtitrlermen berilgen.
Búrkitpen ań aýlaý er adamnyń isi sanalatyny jaily estigen film avtorlary aýyl aqsaqaldaryna baryp, bul jaidyń mánin suraǵan. Sonymen qatar, Otto Bell dástúrdi bilmeitin kórermen durys túsinbei qalýy múmkin degen oimen ańshylyqtyń kei kórinisterin qysqartqanyn aitqan.
Filmniń prodiýseri ári dybystaýshysy «Juldyzdy soǵys» («Zvezdnye voiny») aktrisasy Deizi Ridli boldy. Otto Bell Business Insider portalyna bergen suhbatynda Ridlidiń Aisholpannyń oqiǵasyna erekshe tolqyǵanyn aitqan. Deadline basylymyna bergen suhbatta Deizi ózi de: «Aisholpannyń oqiǵasy maǵan erekshe áser etti. Sondyqtan osy filmniń bir qatysýshysy bolǵym keldi. Jobaǵa qatysqanymdy maqtan etemin», – dedi.
Filmdi Latyn Amerikasy, Jańa Zelandiia, Germaniia, Aýstraliia men Aziiada kórsetý quqyǵy Sony kompaniiasyna tiesili. 20th Century Fox Animation kartinaǵa remeik túsirý týraly kelisózder júrgizip jatyr. Biraq bul ideiany júzege asyrý úshin Sony Pictures kompaniiasynyń kelisimi kerek. Ekeýi básekeles bolǵandyqtan, ázirge bolashaǵy belgisiz. Derekti film negizinde animatsiialyq film jasaý quqyǵy 2 million dollarǵa baǵalanyp otyr. Bul quqyq aiasyna, sondai-aq, álemniń birqatar elderine taratý múmkindigi de kiredi.
Aisholpan qazir Baian-Ólgii qalasyndaǵy Mońǵol-Túrik kolledjinde 10-synypta oqidy.
1 qarasha kúni «Qazaqstandyq búrkitshi qyz» dep maqala jariialaǵan «New York Times» eki kúnnen keiin qateleskenderin jazyp, Mońǵoliiada turatyn qazaq qyzy ekenin aityp, túzetý jariialady. Film týraly basqa da álemdik BAQ jazyp jatyr. Keibiri Aisholpandy «ǵasyrlar dástúrin boiyna sińirgen arý» atady.
Aisholpandy uiań, názik ári batyr qyz degen North West Herald amerikalyq basylymy «Bul film kórermendi Aisholpannyń álemine aparady. Aisholpan óskende dáriger bolýdy armandaidy. Biraq búrkitshilikti tastaǵysy kelmeidi. «Búrkitshi qyz» – jastarǵa shabyt beretin, áserli peizajymen júrekterge jylý beretin film» dep jazdy.
Daily News «Mońǵoliianyń batysyndaǵy Altai taýlarynda túsirilgen film búrkitpen saiatshylyq jasaý dástúrin kórsetedi. Bul kóshpendi qazaqtardyń urpaqtan urpaqqa mura etip kele jatqan óneri. Aisholpan – osy dástúrdi meńgergen erekshe qyz» dep jazdy.
Aita keteiik, Otto Bell «Búrkitshi qyzdy» «Oskarǵa» usynǵaly otyr.
Gúlnur QÝANYShBEKQYZY,
«Egemen Qazaqstan»
