«Býrabai» memlekettik ulttyq tabiǵi parkiniń (MUTP) qyzmetkerleri áleýmettik jelide taraǵan Shýche-Býrabai kýrorty aýmaǵyndaǵy kólderdiń jaǵasynda shashylyp jatqan qoqys týraly aqparattarǵa qatysty pikir bildirdi, dep habarlaidy "Ult aqparat".
Vedomstvonyń málimetinshe, «Býrabai» MUTP Aqmola oblysynyń ǵana emes, ózge kórshi oblystar men taiaý shet elderdiń turǵyndarynyń demalatyn súiikti orny. Jyl saiyn ulttyq parkke 600 myńnan astam adam keledi. Ásirese, demalys jáne mereke kúnderi kelýshilerdiń sany kúrt artady. Sol sebepti, demalyp ketken adamdar ózderinen keiin qoqystaryn qaldyryp ketetin kórinedi.
«Ulttyq parktiń aýmaǵynda siymdylyǵy 1 tekshe metr bolatyn barlyǵy 65-ten astam qoqys konteineri ornatylǵan. Onyń ishinde 25 qoqys konteineri Býrabai kóliniń jaǵasynda ár 200 metr saiyn ornatylǵan. Budan bólek, usaq qoqystardy salatyn 50 aǵash jáshik bar, onyń 30-dan astamy kól jaǵasynda. Mundaǵy metall konteinerler qatty turmystyq qaldyqtar men qoqystarǵa, al aǵash jáshikter usaq qoqystarǵa arnalǵan. Alaida, óńir turǵyndary men qonaqtarynyń jaýapsyzdyǵy jaǵajai aýmaǵyn antisanitarlyq jaǵdaiǵa ákelip soqtyrýda. Ásirese, iri qoqystardan usaq qoqystar salatyn jáshik tez tolyp qalady. Demalýshylardyń keibiri 50-100 metr jerdegi metall konteinerlerge barýǵa erinedi», - deidi «Býrabai» memlekettik ulttyq tabiǵi parkiniń qyzmetkerleri.
Sonymen qatar, park qyzmetkerleri demalýshylardy qorshaǵan ortany aialap, tazalyqty bir sát esten shyǵarmaýǵa shaqyrady.
«Qorshaǵan ortada ómir súre otyryp, tabiǵattyń tamasha siyn búldirmeý úlken jaýapkershilikti, tipti tazalyq pen sana-sezimdi talap etedi. Sol sebepti tamasha demalystan keiin, sońdaryńyzdan qoqystardy jinap, qoqys jáshikterin durys maqsatta paidalansańyzdar deimiz. Plastikalyq shólmek, tamaqtyń qaldyǵy, qarbyzdyń qabyǵy siiaqty iri qoqystardy osyǵan arnalǵan arnaiy metall konteinerine salyp ketýlerińizdi suraimyz. Osy rette: «Tazalyq jinaǵan jerde emes, shashpaǵan jerde bolady» degen qaǵidany esten shyǵarmaiyq!», - dep túiindedi «Býrabai» memlekettik ulttyq tabiǵi parkiniń qyzmetkerleri.
Eske sala keteiik, áleýmettik jelide ótken demalys kúnderi Býrabai kýrortyndaǵy jaǵjai aýmaǵynda qoqystyń shashylyp jatqandyǵy týraly aqparat taraǵan bolatyn. Elimizdiń eń ásem kýrortynda tazalyqtyń bolmaýy jeli qoldanýshylardyń ashý-yzasyn týdyrǵan edi.
