Jaqyn arada tolyqtyrylǵan shynaiylyq bultty qyzmetine táýeldiligimiz artatyn túri bar. Bul óz kezeginde osy tehnologiianyń damýyna jáne keńinen taraýyna túrtki bolmaq.
Aldaǵy ýaqytta túrli kompaniialar bul tehnologiiaǵa óz ataýyn berip, tańbalaýǵa tyrysatynyn baiqaýǵa bolady (mysaly, Microsoft kompaniiasynyń Azure platformasy, Magic Leap kompaniiasynyń «Magicverse» kontseptsiiasy jáne taǵy basqalary). Sonyń arqasynda bul kompaniialar naryqta biregei qyzmetter men tásildemeler usyna alady.
Biraq jalpy barlyǵynyń túbi bir – bul tasymaly qurylǵylarmen bailanysty bultty qyzmettegi derekqor. Ol tolyqtyrylǵan shynaiylyq qurylǵylaryn bizge jańa dúnie ashatyn qaqpaǵa ainaldyrady.
Osy bastaýda jaǵymdy bir jait, keibir basshylar tolyqtyrylǵan shynaiylyq bultty qyzmet júiesin ashyq ustaýdy usynǵan. Osyny tehnologiialyq salalarǵa qatysy bar qaýym da qoldap otyr.
Biraq aqshaǵa tirelgende, jaǵdai múldem ózgerýi múmkin. Ashyǵyn aitqanda, oiyn-saýyq salasy nemese kásipkerlik bolsyn, tolyqtyrylǵan shynaiylyq bultty qyzmeti zor paida tabýǵa jańa múmkindikter berip tur.
Tolyqtyrylǵan shynaiylyq bultty qyzmetine kirý úshin tólemder, sondai-aq onda qosymshalar satyp alý mol tabys alýǵa jol ashady. Qazirdiń ózinde Cognitive3D sekildi osy tehnologiiamen isteý ádisin jiti taldaityn kompaniialar bar.
«Osyndai ashyq platforma baǵdarlamalyq jasaqtama shyǵarýshylary úshin tiimdi bolýy múmkin. Máselen, Uber qyzmeti tolyqtyrylǵan shynailyqtaǵy kóshede taksi shaqyrý túimeshigin ornata alady. Nemese kontsert afishasyna «Bilet satyp alý» túimeshigin kórýińizge bolady », - deidi Spatial kompaniiasy quryltaishylarynyń biri Anand Agaravala.
«Aldaǵy birneshe jylda bul biraz salany ózgertedi dep sanaimyn. Qalanyń ishi tolǵan jarnama. Endi elestetip kórińizshi, sonyń bári joǵalyp, «Erekshe pikir» filmindegidei tsifrlandyrylǵan ári jeke ár adamǵa arnalǵan jarnamaǵa ainaldy delik. Bul maǵan qatty unap tur dep aita almaimyn. Degenmen bolashaqta Instagramyzdyń tolyqtyrylǵan shynaiylyqtaǵy nusqasy osyndai jarnamalarǵa negizdeletin kóresiz».
Derekqor quryp, ony damytý úshin qyrýar qarjy qajet. Sondyqtan alǵashqy tolyqtyrylǵan shynaiylyq bultty qyzmetteri ózara jaqsy bailanysqan aýqymdy jeli bolmasy anyq. Onyń ornyna kóptegen derbes bultty qyzmetter paida bolady.
Árqaisysynyń óz orny bolady. Keibireýi internetti qurǵan tulǵalardyń etikalyq erejelerin saqtap, ashyq ári tegin túrde qyzmet etedi. Endi basqa bireýleri shekteýli túrde qyzmetin qoldanýǵa múmkindik beredi. Ai saiyn jarna tólep, qyzmetine jazylýdy suraityndary da bolady.
«Qalanyń ishi tolǵan jarnama. Endi elestetip kórińizshi, «Erekshe pikir» filmindegidei, sonyń bári joǵalyp, tsifrlandyrylǵan ári jeke ár adamǵa arnalǵan jarnamaǵa ainaldy delik. Bul maǵan qatty unap tur dep aita almaimyn. Degenmen bolashaqta Instagramyzdyń tolyqtyrylǵan shynaiylyqtaǵy nusqasy osyndai jarnamalarǵa negizdeletin kóresiz» - deidi Spatial kompaniiasy quryltaishylarynyń biri Anand Agaravala.
Qajet kezde osy bultty qyzmetter arasynda árekettesýdiń tásilderi bolady. Biraq árqaisysy derbes bolǵandyqtan, ol telearnalar men filmder kóretin ádetimizge uqsas bolatyn túri bar.
Qazirde tsifrlik kontent qalai paidalanatyn qarastyraiyq. Keibir adamdar pirattyq faildar arqyly kúndelikti mýzyka tyńdap, teleshoý kóredi. Bireýler memlekettik radio jáne telearnalardy paidalanyp júr. Al endi basqalary joǵary sapaly ári jaqsy qorǵalǵan Spotify, Pandora, Netflix, Hulu sekildi qyzmetterdi paidalaný úshin aqsha tóleýdi jón kóredi. Tolyqtyrylǵan shynaiylyq bultty qyzmetteri de dál osylai bolmaq.
Sonda biz qalai tańdaý jasaimyz? Menińshe qaýipsizdigi men qolailyǵyna nazar aýdarý qajet. Eger óz derekterińizdiń saqtyǵyn ýaiymdasańyz, onda qorǵanysty qamtamasyz etetin qyzmet túri úshin aqsha tólegenińiz durys bolar. Men jýyrda bul jaiynda Apple kompaniiasynyń jańa Apple Card service qyzmetin mysalǵa keltirip, jazǵan bolatynmyn. Ol eń aldymen tutynýshylarynyń jeke málimetterin qupiia saqtaityny úshin aqsha alatynyn túsindirdim.
Perkins Coie kompaniiasy naýryzda 200 startap basshylary arasynda saýalnama júrgizgen. Oǵan qatysqandardyń 61 paiyzy osy tehnologiialardyń damýyna qatysty jeke málimetterdiń qaýipsizdigi men tutynýshylardyń qupiialyq máselesine alańdaýshylyq bildirgen.
Keńinen taramaǵandyqtan, qalyń jurtqa muny túsiný áli qiyn shyǵar. Sondyqtan mynadai jaǵdaidy qarastyraiyq. Siz kúni boiy yńǵaily ári kameramen jabdyqtalǵan qurylǵyny kózińizge taǵyp júrsiz deiik. Ol qurylǵy smartfonyńyz sekildi qai jerde bolǵanyńyzdy jáne qandai saýda jasaǵanyńyzdy belgilep otyrady. Biraq bul smart-kózildiriktiń mańyzdy bir ereksheligi - ol qyzmet kórsetýshiler men satýshylarǵa iesi jaily mol maǵlumat bere alady.
Máselen, saýdańyz, barǵan jerińiz ben kirgen saittaryńyzdy tirkeýmen qatar tolyqtyrylǵan shynaiylyq kózildirigi naqty qaida qaraǵanyńyzdy qadaǵalap otyrady. Marketologtar tutynýshynyń kóz qimylyn ańdý qajettigin jii aityp turady. Endi naǵyz osy múmkindikti beretin qurylǵy bar, kóz qimylyn qadaǵalaityn tehnologiiamen jabdyqtalǵan kózildirik tutynýshyny ne qyzyqtyratynyn bile alady.
Osydan qai bultty qyzmetke sene alasyz degen saýal týyndaidy. Máselen ol úide men keńsedegi tirshiligińizdi bilgisi keletin hakerlerden kózildirigińizdi saqtap alatyn shyǵar. Biraq ózderi de sizdiń otbasymen otyrǵanyńyzdy anda sanda kórip turmaitynyna kóz jetkizgen jón.
200 startap basshylary arasynda júrgizilgen saýalnama, 61 paiyzy osy tehnologiialardyń damýyna qatysty jeke málimetterdiń qaýipsizdigi men tutynýshylardyń qupiialyq máselesine alańdap júrgenin kórsetken.
Eger buǵan nanbasańyz, onda Bloomberg agenttigi júrgizgen zertteýin qarastyraiyq. Ol Amazon kompaniiasynyń qyzmetkerleri Amazon Echo qurylǵylary ieleriniń jazbalaryn tyńdaitynyn anyqtaǵan. Muny daýyspen basqarylatyn Alexa kómekshiniń qyzmetin jetildirý úshin jasaǵan eken. Biraq qai maqsatta bolmasyn, úiińizdegi daýyspen basqarylatyn qurylǵyǵa jazylǵan jeke áńgimelerińizdi basqa bireýlerdiń tyńdaýǵa múmkindigi bar ekeni anyq.
Aitarlyqtai ziiany joq siiaqty. Degenmen osyndai qupiialyq buzý jaǵdaiy alańdaýshylyqty týdyryp otyr. Óitkeni tolyqtyrylǵan shynaiylyq bultynda smart-kózildirigińizge osyǵan uqsas qyzmet túri usynylady. Kómekshińiz kúndelikti ómirde qaida qaraǵanyńyzdy beinetaspaǵa jazyp alyp, kóz qimylyńyzdy ańdi alady. Sonda biz bul aqparatty kimge senip, tapsyra alamyz?
Aitqan sózderimiz túrli dúniege qatysty kózqarasymyzdy bildiredi. Biraq pikir aitpas buryn, biz ony oi eleginen ótkizip, saralaimyz. Al derek jinaityn quraldar kózimizge túsken búkil adam men zatty jazyp júrse, osy qyzmetke kúshti senimimiz bolýy kerek.
Kóbisi 5G jyldamdyǵy jáne keremet qosymshalardyń kómegimen tolyqtyrylǵan shynaiylyq bultty qyzmeti aldaǵy ýaqytta jetildiriletinin aityp júr. Biraq bul turǵyda eń qundy qasieti – senimdilik bolmaq. Qupiialyqty saqtaý men qaýipsizdikti basty orynǵa qoiyp, qalyń jurttyń senimine ie bolatyn bultty qyzmet ózgelerden ozatyny sózsiz.
