TMD Atqarýshy komitetiniń halyqaralyq baiqaýshylary, RF qoǵamdyq palatasynyń ókilderi elordadaǵy Beipartiialyq sailaýdy baiqaý ortalyǵynda bolyp qaitty, dep habarlaidy QazAqparat.
«Biz - Qazaqstandaǵy sailaýdy baqylaityn resmi halyqaralyq baiqaýshylarmyz. Jalpy sailaýdy baiqaý isimen Reseide de, basqa shet elderde de 8 jyldan beri ainalysyp kelemiz. Qazaqstan men Reseidiń parallel jolmen kele jatqany meni qýantady. Bizdiń burynnan bergi seriktesimiz - QR Azamattyq aliansynyń da aýqymdy jumys atqarǵany kóńilimizden shyǵyp otyr. Munda (Beipartiialyq sailaýdy baiqaý ortalyǵyna) shynynda da kóp aqparat kelip túsetinin, sailaý ýchaskelerinde ne bolyp jatqanyn osynda baqylaýǵa bolatynyn kórdik. Bul - durys qadam. Baýyrlas Qazaqstandaǵy sailaýdy baiqaý isi tolyqqandy júrgizilip jatqanyna qýanyshtymyz», - dedi RF Qoǵamdyq palatasynyń múshesi ári daýys berý boiynsha úilestirý keńesiniń basshysy Maksim Grigorev.
RF Qoǵamdyq palatasynyń múshesi Artem Kirianov ta pikirin ortaǵa saldy.
«Beipartiialyq sailaýdy baiqaý ortalyǵynyń basshylyǵymen kezdese otyryp, qoǵamdy sailaýǵa tartyp, baiqaýshylardy úiretý jaǵynan Qazaqstanda senýge turarlyq azamattardyń baryna qýanyp otyrmyz. Qoǵam ókilderinen eki adam ár ýchaskede baiqaý isine qatysa alady eken. Daiyndyq jumystarynyń materialdarymen, oqytý seminarlarynyń baǵdarlamasymen tanysa kele qoǵamdyq baqylaý deńgeii aitarlyqtai joǵary ekenin baiqaýǵa bolady», - dep atap ótti spiker.
Óz kezeginde Beipartiialyq sailaýdy baiqaý ortalyǵynyń basshysy ári Qazaqstan Azamattyq aliansynyń prezidenti Baný Nurǵazinova atqarylyp jatqan jumystarǵa toqtaldy.
«Buǵan deiin birneshe ret aitqanymdai, 1 jeltoqsannan bastap Beipartiialyq sailaýdy baiqaý ortalyǵy baiqaýshylardy daiyndaý isimen ainalysyp keledi. Onyń ústine bizdiń baiqaýshylar qalalarda ǵana emes, elimizdiń barlyq óńirinde jumys júrgizedi. Qazaqstanda 10 myńǵa tarta sailaý ýchaskesi bar. Árbir ýchaskege baiqaýshylarymyzdy qoiǵymyz keledi», - dedi Baný Nurǵazinova.
