86 jyl buryn (1931-1976) dál osy kúni aqyn, aýdarmashy, dramatýrg, Qazaqstannyń Memlekettik syilyǵynyń laýreaty, «Ǵasyr aqyny» ataǵynyń iegeri Muqaǵali Maqataev dúniege keldi.
Ol Almaty oblysy Raiymbek aýdanynda týǵan. M.Kirov atyndaǵy Qazaq memlekettik ýniversitetin (ál-Farabi atyndaǵy Qazaq ulttyq ýniversiteti) bitirgen.
1952-1969 jyldary Qarasaz bastaýysh mektebinde orys tiliniń muǵalimi, Qazaq radiosynyń diktory, Shalkódede Qyzyl otaý meńgerýshisi, Narynqol aýdandyq «Sovettik shekara» (qazirgi «Hantáńiri») gazetiniń jaýapty hatshysy, «Sotsialistik Qazaqstan» (qazirgi «Egemen Qazaqstan») gazetinde, «Mádeniet jáne turmys» (qazirgi «Parasat»), «Juldyz» jýrnaldarynda ádebi qyzmetker, Jazýshylar odaǵy poeziia bóliminiń keńesshisi qyzmetterin atqarǵan.
1973-1974 jyldary Máskeýdegi Ádebiet jáne óner institýtynda oqyǵan.
Aqynnyń tyrnaqaldy týyndylary Narynqol aýdandyq «Sovettik shekara» gazetinde 1948 jyly jariialanǵan. Onyń «Aq qaiyń áni», «Aqqýlar uiyqtaǵanda», «Arman», «Sholpan», «Raiymbek! Raiymbek!», «Qashqyn», «Motsart. Jan azasy» atty poema tolǵaýlary men 650-den astam lirikalyq óleńderi bar. Ol qazaq óleńin mazmun, pishin jaǵynan túrlendirip, intonatsiia, inversiia, mazmun turǵysynan jańalyq engizdi.
Muqaǵali Maqataev poeziia janrynda ǵana emes, proza, drama, syn salasynda da qalam tartty. Onyń «Qosh, mahabbat» jinaǵyna ár jyldar jazylǵan «Qulpytas», «Marýsianyń taýy», «Ózgermepti», «Áje» áńgimeleri, «Qos qarlyǵash», «Jyl qustary» povesteri men «Qosh mahabbat» pesasy, birneshe syni eńbekteri engen.
Aýdarma salasynda Shekspirdiń sonetterin, Danteniń «Qudiretti komediiasyn», E.Evtýshenko, A.Akopian, F.Morgýn, Ý.Ýitmen, R.Berns, F.Ansaridiń óleńderin tárjimalaǵan. Onyń óleńderine Nurǵisa Tilendiev, Shámshi Qaldaiaqov, Beibit Oraluly, Altynbek Qorazbaev taǵy basqa sazgerler án jazdy. Almatyda aqyn atynda mektep, kóshe jáne sol kóshe boiynda eskertkishi bar. Týǵan aýyly Qarasazda murajaiy ashyldy. Qazaqstan Jazýshylar odaǵy 1985 jyldan beri úzdik ádebi shyǵarma avtorlaryna beriletin Muqaǵali Maqataev atyndaǵy syilyq taǵaiyndaǵan.
