Qazaq ǵalymdary mońǵoliialyq áriptesterimen birlesip, Qutlyq Elteris qaǵannyń kesheni men jazýyn tapty. Bul habar týraly QR Memlekettik keńesshisi Erlan Qarin Facebook paraqshasynda jazdy.
«Qazaq ǵalymdary Darhan Qydyráli, Nápil Bazylhan, Nurbolat Bógenbaev mońǵoliialyq áriptesterimen birlesip Qutlyq Elteris qaǵannyń kesheni men jazýyn tapty. «Nomgon» birlesken ekspeditsiiasyn Halyqaralyq Túrki akademiiasy men Mońǵoliia Ǵylym akademiiasynyń Arheologiia institýty birlesip júrgizgen bolatyn.
Mamandar Nomgon keshenin Kúltegin men Bilge qaǵannyń ákesi, Túrik qaǵandyǵyn qaita jańǵyrtýshy Qutlyq Elteris qaǵanǵa arnalǵan degen tujyrym jasap otyr. Sonymen qatar tabylǵan bitiktas «túrk» ataýy alǵash ret kezdesetin eń kóne túrki dáýiriniń jazba eskertkishi ekenin málim etti.
Bul - túrkologiia ǵylymyna ǵana emes, álemdik ǵylymǵa qosylǵan tyń jańalyq, zor úles. Búgin Darhan Qydyrálimen habarlasyp, qazaq ǵalymdarynyń tarihi tabysymen quttyqtap, qýanyshqa ortaqtastyq. Ol jýyq arada baspasóz máslihatyn ótkizip, bitiktastaǵy jazýlardyń syryn ashyp, jalpy jurtqa jariialaityndaryn aitty. Osylaisha, otandyq ǵalymdar kóne zamannyń kómbesin taýyp, ony álemdik ainalymǵa engizbek» - dedi Qarin.
