Shyǵys Qazaqstan oblysy Altai aýdanynda Buqtyrma kentindegi demalys bazasynda shyqqan órt ormanǵa jaiylyp kete jazdady, dep habarlaidy QazAqparat.
ShQO Tótenshe jaǵdailar departamenti baspasóz qyzmetiniń málimetine súiensek, Altai aýdany Jańa Buqtyrma kentinde ornalasqan demalys bazalarynyń birinen órt shyqqan. Belgili bolǵandai, 2 qabatty aǵash úi otqa orandy.
Úi ieleri qyzyl jalyndy óz betterimen sóndirýge tyrysqan. Alaida odan túk shyqpaǵandyqtan órt sóndirýshilerge qońyraý shalyp, kómek surady.
«Qutqarýshylar sol jerge kelgen kezde tilsiz jaý úige tolyqtai jaiylyp ketken. Jalpy aýdany 60 sharshy metrdi quraǵan ot qabyrǵalardy, shatyrdy, tereze men esik bloktaryn, jihazdy, turmystyq tehnikany jáne jeke zattardy sharpydy. Sondai-aq órttiń jaqyn mańdaǵy úilerge jáne ormanǵa jaiylyp ketý qaýip tóndi», - dep habarlady vedomstvo ókilderi.
Órt sóndirýshiler jalynnyń ary qarai taralýyna jol bermei, tolyqtai aýyzdyqtady. Órtpen kúreske barlyǵy 22 adam men 4 tehnika jumyldyrylǵan.
