Biyl da Ekinshi dúniejúzilik soǵys ardagerlerine 1 mln teńgeden beriledi, dep habarlaidy QazAqparat.
QR Eńbek jáne halyqty áleýmettik qorǵaý vitse-ministri Rýslan Sákeev ortalyq kommýnikatsiialar qyzmetinde ótken brifingide osyndai málimet keltirdi.
«Eńbek jáne halyqty áleýmettik qorǵaý ministrligi oblystardyń jáne respýblikalyq mańyzy bar qalalardyń ákimdikterine Uly otan soǵysyndaǵy jeńiske úles qosqan azamattar joǵaryda atalǵan barlyq sanattar úshin materialdyq kómektiń kepildendirilgen eń tómengi mólsherin belgileýdi usynady. Nátijesinde Uly otan soǵysy qatysýshylary men múgedekterine búkil óńirlerde 1 mln teńge mólsherinde birjolǵy materialdyq kómek kórsetilip jatyr. Burynǵy kontslagerdegi kámeletke tolmaǵan turǵyndarǵa 100 myń teńgeden kem emes, qorshaýdaǵy Leningrad turǵyndaryna jáne qaza tapqan jaýyngerlerdiń jesirlerine 60 myń teńgeden kem emes qarajat qarastyrylǵan. Qaitys bolǵan Uly otan soǵysy múgedekteriniń jubailary men soǵys jyldaryndaǵy tyl eńbekkerlerine 30 myń teńgeden kem emes qarajat qarastyrylǵan. Tólemder búkil óńirlerde tólenip jatyr. Búgingi tańda Uly otan soǵysy ardagerleri tiisti tólemin aldy. Tek 3-4 óńir qaldy. Olar da 9 mamyrǵa deiin tóleidi», - dedi Rýslan Sákeev.
