Búginnen bastap zeinetaqy men bala dúniege kelgende beriletin bir jolǵy járdemaqy kólemi 20 %-ke, áskeri qyzmetshilerdiń jalaqysy 25 %-ke kóteriledi. Bul týraly Elorda Aqparat habarlady.
Eske sala ketsek, Memleket basshysy Nursultan Nazarbaev maýsymnyń 20-da «Áleýmettik qamsyzdandyrýǵa qatysty birqatar zań aktilerine ózgertýler men tolyqtyrýlar engizý týraly» QR zańyna qol qoiǵan. Osy qujatqa sáikes 2017 jylǵy 1 shildeden bastap: yntymaqty zeinetaqy mólsheri 11 paiyzǵa; bazalyq zeinetaqy mólsheri 13 paiyzǵa kóbeitiledi. Nátijesinde, búginnen bastap eń tómengi zeinetaqy 45 711 teńgeni, ortasha zeinetaqy — 66 676 teńgeni quraidy. 2016 jyly eń tómengi zeinetaqy kólemi — 37 789 teńge bolǵan edi, sáikesinshe búgingi kórsetkish 2016 jyldyń 1 shildesindegi kórsetkishpen salystyrǵanda 20%-ǵa kóbirek.
Taǵy bir atap óterligi, bul sharapat elimizdegi 2 millionnan astam zeinetkerdi qamtityn bolady jáne ol úshin qosymsha qujattar qajet emes. Zeinetaqyny arttyrýdyń úshinshi kezeńi 2018 jylǵy 1 shildeden bastap júrgiziletin bolady. Ol bazalyq zeinetaqyny taǵaiyndaý ádistemesiniń ózgerýimen bailanysty. Búgingi tańda bazalyq zeinetaqy zeinetkerlik jasqa jetken adamdarǵa birdei mólsherde taǵaiyndalady. Jańa ádistemege sáikes, ol zeinetaqy júiesine qatysý ótiline bailanysty bolady, bul rette 1998 jylǵa deiingi eńbek ótili jáne 1998 jyldan keiingi jinaqtaýshy zeinetaqy júiesine aýdarylǵan zeinetaqy jinaqtarynyń merzimi eskeriledi. Osy jyly zeinetaqy mólsheriniń 20 paiyzǵa deiin artýyn eskere otyryp, zań jobasynda bazalyq zeinetaqynyń eń tómengi mólsherin kúnkóris deńgeiinen 50-den 54 paiyzǵa deiin ulǵaitý usynylǵan.
Osylaisha, 2018 jylǵy 1 shildeden bastap bazalyq zeinetaqy mólsheri, azamattardyń eńbek ótili jáne jinaqtaýshy zeinetaqy júiesine aýdarymdar kezeńi: 10 jyldan aspasa, onda eń tómen kúnkóris deńgeiiniń 54 paiyzyn; 20 jyl bolsa — 74 paiyzyn; 33 jyldan asqanda — 100 paiyzyn quraidy. Nátijesinde, eńbek ótili men jinaqtaýshy zeinetaqy júiesine neǵurlym kóp qatysqan azamattardyń zeinetaqysy joǵary bolady.
2018 jylǵy 1 shildeden bastap 2 mln zeinetkerdiń: 44,7 paiyzy eń tómen kúnkóris deńgeiiniń 74 paiyzynan joǵary alatyn bolady; 45,2 paiyzy eń tómen kúnkóris deńgeiiniń 100 paiyzyn alady nemese bazalyq zeinetaqysy búgingige qaraǵanda 2 ese kóp bolady dep kútilýde. Budan basqa, zań jobasynda balaly otbasylardy memlekettik qoldaýǵa baǵyttalǵan normalar qarastyrylǵan. Birinshiden, bala týýyna bailanysty beriletin birjolǵy járdemaqy mólsherin 20 paiyzǵa arttyrý kózdelgen. Járdemaqy mólsheri birinshi, ekinshi, úshinshi balaǵa 31,41 ailyq eseptik kórsetkishten 38 ailyq eseptik kórsetkishke deiin (71 270 teńgeden 86 222 teńgege deiin), tórtinshi jáne odan kóp balaǵa 52,35 ailyq eseptik kórsetkishten 63 ailyq eseptik kórsetkishke deiin (118 783 teńgeden 142 947 teńgege deiin) artatyn bolady.
Mamyr aiynda birqatar áskeri qyzmetshini memlekettik nagradamen marapattaý barysynda Elbasy Nursultan Nazarbaev Táýelsizdiktiń 25 jyldyǵynyń jáne Qarýly Kúshterdiń 25 jyldyǵynyń qurmetine 1 shildeden bastap Qorǵanys ministrliginiń, Ulttyq qaýipsizdik qyzmetiniń, Ulttyq gvardiianyń jáne Memlekettik kúzet qyzmetiniń áskeri qyzmetshileriniń laýazymdyq jalaqylaryn 25 paiyzǵa kóterý týraly sheshimin málimdegen edi.
