Búgingi taǵaiyndaý, eń aldymen, maǵan artylǵan úlken senim dep bilemin. QR Prezidenti Ákimshiligi Basshysynyń birinshi orynbasary bolyp taǵaiyndalǵan Dáýren Abaev Facebook-paraqshasynda osylai jazdy, dep habarlaidy "Ult aqparat".
«Qurmetti dostar! Barshańyzǵa lebiz-tilekterińiz úshin rizashylyǵymdy bildiremin. Elimizdiń aqparat salasyna jaýapty ministrlikke jetekshilik etken jyldary ózderińizben birge tabandy, jemisti eńbek ettik dep sanaimyn. Biz kótergen bastamalardy qoldap, árkez oi-pikirlerińiz ben syn-eskertpelerińizdi ashyq bildirip, qoǵam úshin mańyzdy máselelerge janashyrlyq tanytqandaryńyz úshin Sizderge zor alǵys aitamyn. Qazirgidei kúrdeli ýaqytta qoǵamnyń tas-túiin aýyzbirligi men belsendi azamattyq ustanym aýadai qajet», - dep jazdy ol.
Sondai-aq D.Abaev QR Aqparat jáne qoǵamdyq damý ministrliginiń jáne ministrlikke qarasty uiymdardaǵy sarapshydan bastap basshylyq quramyna deiin árbir qyzmetkerine erekshe qurmet bildirip, alǵys aitatynyn jetkizdi.
«Al búgingi taǵaiyndaý, eń aldymen, maǵan artylǵan úlken senim dep bilemin. Tapsyrylǵan qyzmetti abyroimen atqaryp, qajyr-qairat pen bilim-biligimizdi Otanymyzdyń igiligine arnaimyz», - dedi ol.
Eske salaiyq, búgin Dáýren Abaev QR Prezidenti Ákimshiligi Basshysynyń birinshi orynbasary bolyp taǵaiyndaldy.
