Búgin Túrkistan qalasynda «Túrkistan-Arena» stadionynda XI-shi jazǵy Ýniversiadanyń oiyndarynyń resmi ashylý saltanaty ótedi, dep habarlaidy "Ult aqparat".
Aitýly shara el Táýelsizdiginiń jáne Q.A.Iasaýi atyndaǵy HQTÝ-dyń 30 jyldyǵy qarsańynda uiymdastyrylyp otyr.
Sondai-aq, «Túrkistan - túrki áleminiń rýhani astanasy» atanyp, atalǵan sport sharasy oblys ortalyǵynda alǵash ret ótip otyr.
Bul týraly brifingte Qoja Ahmet Iasaýi atyndaǵy Halyqaralyq qazaq-túrik ýniversitetiniń rektory Janar Temirbekova málimdedi.
«HI jazǵy Ýniversiada - sporttyń 30 túrinen elimizdiń ár túkpirinen myqtylardy biriktirgen aýqymdy sporttyq-buqaralyq joba. Ýniversiada aiasyndaǵy jarystar Nur-Sultan, Almaty, Túrkistan, Taraz, Qostanai, Óskemen qalalarynda ótip jatyr. Qazirgi tańda 20 ýniversitettiń stýdentteri ózara saiysqa túsýde. Aita ketetin jait, Túrkistan qalasyndaǵy XI jazǵy ýniversiadanyń resmi ashylý saltanatynda elimizdiń 20 joǵary oqý oryndarynan quralǵan arnaiy sherý, sahnalyq kórinister, fleshmob ótetin bolady. Atalǵan sport sharasy Turkistan telearnasynan tikelei efirde kórsetiledi», - dedi Janar Amangeldiqyzy.
Sondai-aq, brifingke qatysqan QR BǴM «Ulttyq ǵylymi-praktikalyq dene tárbiesi ortalyǵynyń» bas direktory Tastanbek Esentaev pen halyqaralyq dárejedegi tóreshi, professor Ábdisadyq Halilaev jarysqa qatysyp jatqan komandalardyń daiyndyǵy óte joǵary ekenin atap ótti.
Ýniversiada oiyndary kezinde barlyq karantin talaptary saqtalady.
Sportshylar PTR test arqyly qabyldanyp, jarystarǵa jiberilip jatyr.
Biylǵy jeńimpazdar 2022 jyly Qytaida ótetin Dúniejúzilik jazǵy ýniversiadaǵa Qazaqstan qurama komandasy sapynda el namysyn qorǵaidy.
