Qazaqstanda jyl saiyn maýsym aiynyń úshinshi jeksenbisinde meditsina qyzmetkerleri kúni atap ótiledi, dep habarlaidy QazAqparat.
Buǵan deiin QR Densaýlyq saqtaý ministri Eljan Birtanov meditsina qyzmetkerlerin kásibi merekemen quttyqtady.
Ásirese COVID-19 pandemiiasynda juqpaly aýrýlar aýrýhanasynda, provizorlyq statsionar, jedel meditsinalyq járdem stantsiialary men barlyq densaýlyq saqtaý uiymdarynda meditsina qyzmetkerleriniń joǵary jaýapkershilikpen, kásibi biliktilikpen eńbek etip jatqanyn aitty.
«Qazaqstandyq dárigerlerdiń osyndai qiyn ýaqytta basymyzǵa túsken aýyrtpalyqty jeńe alatynyna senimdimin. Men buǵan qazir áriptesterimniń qolynda emdelip jatyp taǵy kóz jetkizdim - olar óz isiniń kásibi sheberi. Barshańyzǵa myń alǵys!», - deidi E. Birtanov.
Sońǵy derekterge sáikes, elimizde 16 779 adam COVID-19 virýsyn juqtyrdy. Qazaqstandyq dárigerler ázirge 10 671 adamdy emdep shyǵardy. Odan bólek, elimizde 2 myńǵa jýyq meditsina qyzmetkeri jáne vedomstvo basshysy Eljan Birtanov koronavirýs juqtyryp aldy.
27 mamyrda Ulttyq qoǵamdyq senim keńesiniń 3-otyrysynda QR Prezidenti Qasym-Jomart Toqaev dárigerlerdiń eńbekaqysyn kezeń-kezeńimen kóbeitýdi tapsyrdy.
«Olardyń ailyǵy ekonomikadaǵy ortasha jalaqydan 2,5 ese artyq bolýy kerek. Bul kórsetkishke 2023 jylǵa qarai qol jetkizý qajet. Osy kúrdeli kezeńde barshamyz meditsina mamandarynyń qajyrly eńbegine kýá boldyq», - dedi Qasym-Jomart Toqaev.
Sonymen birge, koronavirýs infektsiiasyn eńserýge atsalysqan meditsina qyzmetkerleri eńbekaqyǵa qosymsha ústemeaqy alady. Naýryz aiynyń sońynda TJ rejimin qamtamasyz etý jónindegi Memlekettik komissiia epidemiiaǵa qarsy sharalarǵa atsalysqan meditsina qyzmetkerlerine ústemeaqy taǵaiyndady.
Qaýiptiligi boiynsha birinshi top mamandarynyń jalaqysyna aiyna 850 myń teńge ústemeaqy qosylady. Ekinshi top - provizorlyq statsionar men jedel járdem qyzmetteriniń dárigerleri, orta jáne kishi meditsina qyzmetkerleri. Olardyń ústemaqysy aiyna 425 myń teńgeni quraidy. Úshinshi topqa karantindik statsionar dárigerleri, orta jáne kishi meditsina qyzmetkerleri, sanitarlyq dárigerler,jedel járdem júrgizýshileri jáne taǵy basqalary kiredi. Olar aiyna 212 myń teńge ústemeaqy alady.
