Qyrǵyzstanda kezekten tys prezident sailaýy men referendým aldyndaǵy tynyshtyq kúni bastaldy, dep habarlaidy "Ult aqparat" Kabar agenttigine silteme jasap.
Osylaisha kandidattardyń sailaýaldy úgit-nasihaty toqtady. Tynyshtyq kúni sailaýshylar úmitkerlerdiń baǵdarlamasyna taǵy bir kóz júgirtip, taldap, óz tańdaýyn jasaidy.
Sonymen qatar Ortalyq sailaý komissiiasy akkredittegen buqaralyq aqparat quraldary men internet basylymdar da úgit-nasihat júrgize almaidy.
Tynyshtyq kúniniń talabyn buzǵandardy OSK jaýapkershilikke tartýy múmkin.
Qyrǵyzstanda kezekten tys prezident sailaýy men referendým 2021 jylǵy 10 qańtarda ótedi. OSK málimetinshe, sailaýda 3 mln 563 myń 574 sailaýshy daýys bere alady.
Prezidenttikke 17 úmitker talasyp otyr. Munyń aldynda olardyń sany 18 edi, alaida Rashid Taǵaev atty kandidat sailaýǵa qatysýdan bas tartty. Onyń esimi biýlletennen syzylyp tastalady.
Referendýmda mynadai basqarý formasyn tańdaý múmkindigi beriledi:
— prezidenttik respýblika
— parlamenttik respýblika
— eki nusqaǵa da qarsymyn.
Sailaýshylarǵa eki biýlletennen beriledi. Aq tústi biýlleten - prezident sailaýyna, kók tústi - referendýmǵa.
