Bul mereke Áielderdiń halyqaralyq demokratiialyq federatsiiasynyń kongresinde 1949 jyly resmi túrde bekitildi. 1950 jyldan bastap turaqty túrde atalyp ótedi. Mundai merekeni bekitý týraly usynys alǵash ret 1925 jyly Jenevada ótken Dúniejúzilik konferentsiiada jasaldy.
Balalardyń bul merekesi nelikten dál 1 maýsym kúni atap ótiletindigi týraly naqty málimetter joq.
Boljamdardyń bir nusqasy boiynsha, 1925 jyly 1 maýsymda Qytaidyń bas konsýly San-Fransiskoda qytailyq jetim balalardyń bir tobyn jinap, olarǵa Dýan-ý tsze festivalin (Qaiyq-aidaharlar festivali) ótkizdi. Sátti kezdeisoqtyqpen bul kún Jenevada «balalar» konferentsiiasynyń ótkizilýimen sáikes keldi.
Balalardyń densaýlyǵyn saqtaý jáne jaǵdaiyn jaqsartý máselesi anaǵurlym ózekti bolǵan Ekinshi dúniejúzilik soǵystan keiin, naqty aitqanda 1949 jyly Parijde áielder kongresi ótti. Onda balalar baqytynyń jalǵyz kepili retinde ornyqty beibitshilikti qamtamasyz etýge talmai kúresý anty aityldy. Bir jyldan keiin, 1950 jyldyń 1 maýsymynda Halyqaralyq balalardy qorǵaý kúniniń alǵashqy meiramy atap ótildi, osydan keiin bul data jyl saiyn merekelenedi.
Halyqaralyq balalar kúniniń óziniń bairaǵy bar. Ósimdi, úilesimdikti, balǵyndyq pen shurailylyqty bildiretin jasyl fonda kórsetilgen Jerdiń ainalasyna qyzyl, sary, kók jáne aq stilizatsiialanǵan músinder ornalastyrylǵan. Adamdardyń bul pishini alýandylyq pen tózimdilikti bildiredi. Ortaǵa ornalastyrylǵan Jerdiń belgisi - ortaq úiimizdiń simvoly.
BUU-nyń júrgizgen saýalnamasyna júginsek, búgingi tańda álemde árbir onynshy bala úlkender tarapynan jasalatyn zorlyq pen zombylyqqa ushyraidy eken. Sondai-aq, álemde ómiri qaterge toly balalar da barshylyq. Ash-jalańashtyq, soǵys órti, teraktiler balalar ómirine qaýip tóndirip qana qoimai, olardy baqytty balalyǵynan, álemdegi basqa qatarlastary sekildi bilim alyp, tárbielený múmkindiginen aiyrady. Sondyqtan bul kúni turaqsyzdyq jailaǵan elderdegi balalarǵa qamqorlyq máselesi de nazardan tys qalmaidy.
Sondai-aq, álem halyqtary 20 qarasha kúni Halyqaralyq náresteler kúnin, 16 maýsym kúni Afrikada balalardy qorǵaý kúnin merekeleidi.
Qazaqstanda 1 maýsym kúni balalarǵa arnalǵan kóptegen mádeni sharalar uiymdastyrylyp, jalpyhalyqtyq deńgeide atalyp ótedi.
