Búgin Qazaqstannyń halyq jazýshysy, aqyn, Qazaqstan Respýblikasynyń alǵashqy Ánuranynyń sózin jazǵan avtorlardyń biri Qadyr Myrza Áli tiri bolsa, 83 jasqa tolar edi, dep habarlaidy "Ult aqparat".
Qadyr Ǵinaiatuly 1935 jyly 5 qańtarda Oral oblysynyń Jympity kentinde (BQO, Syrym aýdany, Jympity aýyly) ómir esigin ashqan. 1958 jyly Qazaq memlekettik ýniversitetiniń filologiia fakýltetin bitirip, eńbek jolyn «Baldyrǵan» balalar jýrnalynda ádebi qyzmetker bolyp bastaǵan. Keiin «Juldyz» jýrnalynda jaýapty hatshy, bas redaktordyń orynbasary qyzmetterin atqaryp, 1968-1973 jyldary «Jazýshy» baspasynda qazaq poeziiasy bóliminiń meńgerýshisi, «Balaýsa» baspasynyń redaktory bolǵan. Bul qyzmetinen keiin Qazaqstan Jazýshylar odaǵynda poeziia sektsiiasynyń keńesshisi bolyp eńbek etken.
Qadyr Myrza Álige 1966 jyly «Oi ormany» atty óleń jinaǵy úshin Qazaqstan Lenin komsomolynyń syilyǵy beriledi. Arada 14 jyl ótkennen keiin aqynnyń «Jeruiyq» atty jyr kitaby jaryqqa shyǵyp, otty da oily eńbegi úshin aqyn Qazaq KSR Memlekettik syilyǵynyń laýreaty atanady.
Qadyr Myrza Álidiń tuńǵysh óleńi 1954 jyly respýblikalyq «Pioner» balalar jýrnalynda jaryq kórgen. Ǵumyr boiy tynymsyz eńbek etip, keiingi býynǵa mol mura qaldyrǵan aqynnyń óleńderi orys, nemis, aǵylshyn, frantsýz, fin, qyrǵyz, litva, tatar, ázerbaijan tilderine aýdarylǵan.
Orys tilinde «Bessonnitsa» (1967), «Belaia iýrta» (1968), «Solovinyi sad» (1971), «Stepnye pýti» (1975), «Tvoi dom» (1976), «Verhnaia strýna dombry» (1976), «Ladoni» (1984), «Nijnaia strýna dombry» (1985) jáne taǵy basqa kitaptary jaryqqa shyqsa, ózbek tilinde «Kúmis qońyraý» (1975), qyrǵyz tilinde «Alaqan» (1979), ázerbaijan tilinde «Bulbul baǵy» (1980), mońǵol tilinde «Shymyr jańǵaq» sekildi eńbekteri álemniń ádebietsúier qaýymyna jol tartty. Ómirinde jetpisten astam poeziialyq jáne prozalyq, sondai-aq ádebi-syn kitaptary jaryq kórip, shyǵarmalary mektep oqýlyqtaryna endi. Aqynnyń ánge arnap jazylǵan óleńderiniń sany eki júzden asady. Ánge jazylǵan óleńderi de «Kúnder-ai» atty jeke kitap bolyp basylyp shyqty.
Qadyr Myrza Álidiń eńbegi óleńmen shektelip qalǵan emes. Daryndy aqyn halyq folklorynyń ataqty keiipkeri Aldar kóse jaily «Saqal saýdasy», «Qasqyr qaqpan» atty ótkir satiraly komediiasynyń avtory. Sondai-aq, Qadyr Myrza Áliniń ult azattyǵyn ańsaǵan Mahambettiń eń sońǵy kúnderine arnalǵan «Jaraly jolbarys» atty jáne «Ámir Temir» kesek dramalyq shyǵarmalary jaryq kórdi.
2001 jyl Qadyr Myrza Áli Táýelsiz «Tarlan» syilyǵyna ie boldy. 1993 jyly aqyn álemdik poeziiaǵa qosqan asa zor eńbegi úshin Mońǵoliianyń halyqaralyq «AVIaS» syilyǵyn ielendi. Klassik aqyn Qazaq KSR Joǵarǵy Keńesine eki ret depýtat bolyp ta sailanǵan. Qazaq KSR Joǵarǵy Keńesi Prezidiýmynyń múshesi de bolǵan.
«Aqyndyq shyǵar aiypty,
Áli bilmen sebebin.
Óleńge aityp qoiyppyn,
Ómirdiń aitpa degenin», - dep jyrlaǵan aqyn Qadir Myrza Áli 2011 jyly 24 qańtarda 76 jasqa tolǵan shaǵynda ómirden ótti.
