Foto: Videodan alynǵan skrin
Búgin — Astana kúni. Soǵan orai, qalada 100-den astam merekelik is-shara uiymdastyrylyp jatyr. Jibek Joly arnasynyń «Búgin LIVE» baǵdarlamasyna qonaq bolǵan Astana qalasy mádeniet jáne ónerdi damytý bóliminiń basshysy qala qonaqtaryn qandai tosyn syilar kútip turǵanyn baiandady.
— Astana qalasynyń ákimdigi Astana kúnine orai 100-den astam is-shara uiymdastyrýdy josparlaǵan. Bul sharalardyń qatarynda mádeni-buqaralyq, sporttyq jáne áleýmettik baǵyttaǵy baǵdarlamalar qamtylǵan.
Qalalyq Mádeniet basqarmasy quramyndaǵy 14 mekemeniń barlyq ujymy merekege belsene qatysady.
5–6 shilde kúnderi Ázirbaijan Mámbetov atyndaǵy teatrda «Armandar oryndalady» qoiylymynyń tusaýy kesiledi. Ereksheligi — qoiylymǵa kásibi ártister emes, túrli jumysshy mamandyq ieleri qatysady.
Sondai-aq qalalyq «Perfomans» festivali ótedi. Ol ortalyq «Jetisu» saiabaǵynda sherý túrindegi sahnalyq kostiýmdermen bastalyp, ashyq aspan astyndaǵy qoiylymdarmen jalǵasady. Kirý — tegin.
6 shilde kúni qalanyń shet aimaqtaryndaǵy 6 aýdannyń 15 turǵyn úi alabynda kúndiz kontsert ótedi.
Keshke Astana Arena stadionynda Open Air kontserti uiymdastyrylady. Onda Qazybek Quraiysh, «Dos-Muqasan», Nazima, 2rar syndy tanymal oryndaýshylar óner kórsetedi.
Dál sol sátte «Qazaq Eli» alańynda jastarǵa arnalǵan Jastar Energy kontserti ótedi. Miras Júnisov, Artur jáne Erlan Qanatuly sahnaǵa shyǵady, — deidi Aqerke Jumabaeva.
Mereke qarsańynda Astana qalasynyń turǵyndary men qonaqtaryna arnalǵan otbasylyq sharalar da uiymdastyrylmaq.
— Astana qalasynda «Merekelik saiabaq» jobasy aiasynda ashyq aspan astynda túrli otbasylyq is-sharalar ótedi. Balalarǵa sýret salý, beineleý, otbasy bolyp qatysatyn shyǵarmashylyq belsendilikter uiymdastyrylady.
Sonymen qatar, 1 maýsymnan bastap «Otbasy TIME» jobasy iske qosylǵan. Demalys kúnderi qala saiabaqtarynda mádeni-buqaralyq is-sharalar men ashyq aspan astyndaǵy kino kórsetilimderi ótip jatyr. Bul jobalar otbasylarǵa arnalǵan sapaly ári mazmundy demalys usynýdy kózdeidi, — deidi Astana qalasy mádeniet jáne ónerdi damytý bóliminiń basshysy.
Aqerke Jumabaeva astanalyq otbasylardy ekologiialyq sharaǵa da atsalysýǵa shaqyrdy.
— Astana qalasynyń tazalyǵyna basa mán berilip otyr. «Taza Qazaqstan» aktsiiasy aiasynda qoldanylǵan plastik qaqpaqtardan 4 metrlik mysyq músini jasalady.
Kez kelgen otbasy óz plastik qaqpaqtaryn ákelip, osy sharaǵa qatysa alady. Bul joba arqyly sanaly tutyný men ekologiialyq mádenietti qalyptastyrý maqsat etilgen.
Sonymen qatar, qaladaǵy halyqtyń tyǵyzdyǵy eskerilip, is-sharalar birneshe jerde qatar uiymdastyrylady, — dedi ol.
Aita ketelik búgin Ortalyq Aziia men Eýraziia keńistigindegi mańyzdy saiasi, ekonomikalyq jáne mádeni ortalyqqa ainalǵan elordamyz – Astana kúni.
