Qazaqstandyqtar Aleksandr Býblik pen Andrei Golýbev juptyq synda Rolan Garros týrniriniń jartylai finalyna shyqty, dep habarlaidy "Ult aqparat".
Qazaqstandyq jup Frantsiia ashyq chempionatynyń shirek finalynda monakolyq Hiýgo Nis - germaniialyq Tim Piýtspen kúsh synasty.
A.Býblik pen A.Golýbev matchty birden breikpen bastady – 2:0. Taǵy bir breik – 5:2. Budan keiin monakolyq-germaniialyq jup esepti qysqartqanymen, set qazaqstandyqtardyń enshisinde ketti – 6:4.
Qazaqstandyq jup ekinshi sette de 2:0 esebimen alǵa shyqty. Aqyry osy basymdylyqty saqtap, kezdesýdi sátti aiaqtady – 6:4.
Báseke 1 saǵat 16 minýtqa sozyldy.
Qazaqstandyq jup finalǵa shyǵý úshin ispaniialyqtar Pablo Andýhar – Pedro Martinespen talasady.
Osylaisha A.Býblik pen A.Golýbev juptyq synda Qazaqstan tennisi tarihynda tuńǵysh ret Frantsiia ashyq chempionatynyń jartylai finalyna shyǵyp otyr.
Eske sala keteiik, budan buryn Elena Rybakinanyń «Úlken dýlyǵa» týrniriniń 23 dúrkin chempiony Serena Ýiliamsti utqanyn, Timofei Skatovtyń Almaty jarysyn jeńispen bastaǵanyn jazǵan bolatynbyz.
Sondai-aq E.Rybakina juptyq synda da Rolan Garros týrniriniń shirek finalyna shyqty.
