«BTA Banki» AQ direktorlar keńesiniń tóraǵasynan 1 mln AQSh dollaryn bopsalaǵandar ustaldy, dep habarlaidy QazAqparat tilshisi.
"2019 jylǵy 19 qańtarda Bas prokýratýranyń Ishki tergep-tekserý departamentiniń qyzmetkerleri Ulttyq qaýipsizdik komitetimen birlesip, Almaty qalasy boiynsha Memlekettik kirister departamenti Ekonomikalyq tergeý qyzmetiniń qyzmetkeri D.Ysqaqovty jáne ýaqytsha jumyssyz D.Álpiev pen E.Súleimanovti qylmys ústinde ustady", - dep atap ótedi vedomstvodan.
Bas prokýratýra málimetinshe, atalǵan adamdar «BTA Banki» AQ Direktorlar keńesiniń tóraǵasynan 1 mln AQSh dollaryn Bas prokýratýranyń Arnaiy prokýrorlar qyzmetiniń is júrgizýindegi qylmystyq is boiynsha máseleni sheshý úshin alaiaqtyq jolmen bopsalaǵan.
Bul rette D.Ysqaqov osy qylmystyq is boiynsha Bas prokýratýranyń vedomstvoaralyq jedel-tergeý tobynyń quramyna kirmegen.
"D.Ysqaqov, D.Álpiev jáne E.Súleimenovtarǵa qatysty Almaty qalasynyń mamandandyrylǵan tergeý soty «qamaýǵa alý» túrindegi bultartpaý sharasyn taǵaiyndady. Is boiynsha qajetti tergeý áreketteri júrgizilýde. Ózge aqparat tergeý múddesine bailanysty jariialanbaidy", - delingen taratylǵan aqparatta.
