Baqytjan Saǵyntaev Premer-ministr retinde Úkimettiń alǵashqy otyrysyn ótkizýde. Buǵan deiin QR Prezidenti Nursultan Nazarbaevtyń jarlyǵymen Ministrler kabinetiniń jańa quramy bekitilgen bolatyn. Otyrys barysynda B.Saǵyntaev ministrlerge sheteldik saparlardy qoia turyp, barlyq bastamalady xalyqqa túsinikti tilde jetkizýdi tapsyrdy, dep xabarlaidy Baq.kz tilshisi.
«Otyrys basynda Úkimet basshysy Prezidenttiń senimi úshin óz alǵysyn bildirip, Ministrler kabinetiniń jańa quramyn tanystyryp shyqty. «Elbasy Nursultan Nazarbaev Úkimettiń quramyn kóp ózgertken joq. Bul Prezidenttiń Ministrler kabinetiniń buǵan deiingi jumysyna degen senimi bolsa kerek. Sol úshin óz alǵysymyzdy bildiremiz»,-dedi B.Saǵyntaev.
Osydan keiin Premer-ministr Prezidenttiń Aqordada ótken Úkimettiń keńeitilgen otyrysynda bergen tapsyrmalaryn taǵy bir márte táptishtep shyqty.
«Osy tapsyrmalar úshin suranys qatań bolady. Onyń barlyǵy belgilengen merzimde jáne sapaly oryndalýy tiis. Sondyqtan bárimizdi qaýyrt jumys kútip tur. Elbasymen birge baratyn saparlar bolmasa, búkil sheteldik is-saparlardy jyldyń sońyna deiin qoia turý qajet. Asa bir qajettilik týyndai qalsa, onda meniń jeke ókimim boiynsha shyǵasyzdar. Elimizdiń óńirlerine jasaityn saparlarǵa da kelisip shyǵasyzdar. Sizder Úkimet tarapynan qandai sheshimder kerek, tez arada anyqtap, usynys engizińizder. Biz qabyldaǵan sheshimder qarapaiym xalyqqa túsinikti bolýy tiis. Bizdiń kez kelgen sheshimderimiz jurtshylyqqa tez arada jetip, maqsat-mindetterdi únemi túsindirip otyrý qajet»,-dep atap kórsetti B.Saǵyntaev.
