Búgin Úkimet otyrysynda turǵyn úi jáne áleýmettik nysandar qurylysy máselesi qarastyryldy. Premer-ministr Baqytjan Saǵyntaev osy saladaǵy qalǵan josparlanǵan jumysty táýelsizdiktiń 25 jyldyǵy mereitoiyna deiin aiaqtap, halyqqa esep berý qajettigin aitty, dep habarlaidy Baq.kz tilshisi.
«Elimizde 25 jylda 1 millionǵa jýyq otbasy baspanaly boldy. 1400 mektep, 1300 densaýlyq saqtaý nysandary iske qosylyp otyr. Táýelsizdigimizdiń 25 jyldyǵyna deiin qalǵan az ýaqytta qalǵan nysandardyń bárin ýaqytynda bitirip, turǵyndarǵa jumysymyzdyń bitkeni týraly esebimizdi berýimiz qajet. Búkil sharýamyzdy bitirýge múmkindigimiz jetkilikti», - dedi B.Saǵyntaev.
«Nurly jol» baǵdarlamasy aiasynda 2020 jylǵa qarai 4,5 mln sharshy metr úi salý kózdelgen, onyń ishinde 1,7 mln sharshy metr jaldamaly úi, 2 mln sharshy metr kredittik baspana jáne 0,8 mln sharshy metr kommertsiialyq úi paidalanýǵa beriledi. Bul maqsatqa 145 mlrd teńge bólindi, onyń ishinde 2015 jyly jaldamaly jáne kredittik baspana salýǵa 122,5 mlrd teńge, al 2016 jyly jaldamaly baspana qurylysyn jalǵastyrýǵa 22,5 mlrd teńge qarastyrylǵan.
Budan bólek, biyl Memleket basshysynyń tapsyrmasy boiynsha turǵyn úi qurylysyn yntalandyrý úshin qosymsha 360 mlrd teńge bólindi. Nátijesinde memlekettik qarjy esebinen 2015 jyly jáne biylǵy jyldyń ótken kezeńinde 22,6 myń otbasyǵa úi berilgen. Al biylǵy jyldyń sońyna deiin taǵy 6,8 myń otbasy baspanamen qamtamasyz etilmek. 2017 jyly 33 myńnan astam páter qonys toiyn toilaýǵa daiyn bolady.
Aiymgúl ÁBILEVA
