Britaniiada 77 jasynda sovet dissidenti, quqyq qorǵaýshy jáne jazýshy Vladimir Býkovskii qaitys boldy. Dissident júregi Kembridj aýrýhanasynda toqtaǵanyn Býkovskii atyndaǵy ortalyq habarlady, dep jazady Azattyq.
Býkovskii 1942 jyly jeltoqsannyń 30-yna Bashqurt avtonomiialy respýblikasynyń Belebei qalasynda jazýshy men jýrnalist otbasynda dúniege kelgen. Sovet odaǵy kommýnistik partiiasynyń birinshi hatshysy Nikita Hrýshevtiń 20 sezde Stalindi aiyptaǵan baiandamasyn tyńdaǵannan keiin 14 jastaǵy jasóspirim kommýnistik ideologiianyń bitispes qarsylasyna ainaldy. 1959 jyly qoljazba jýrnal shyǵarýǵa qatysqany úshin mektepten shyǵarylyp, bilimin keshke mektepte jalǵastyrýǵa májbúr bolǵan.
Máskeý memlekettik ýniversitetinde oqyp júrgen shaǵynda, 1960 jyly Máskeýdegi Maiakovskii eskertkishiniń aldynda ótetin jastardyń turaqty jiynyn uiymdastyrýshylardyń biri boldy. 1963 jyly mamyr aiynda iýgoslav Milovan Djilastyń "Jańa tap" ("Novyi klass") tujyrymdamasyn kóbeitip, taratýǵa talpynǵany úshin alǵash ret tutqynǵa alyndy. 1965 jyly bostandyqqa shyqqan soń Andrei Siniavskii men Daneliiany qorǵaýǵa arnalǵan "jariialylyq mitingisin" ázirleýge belsene qatysty. Osydan keiin psihiatriialyq aýrýhanaǵa kúshpen jatqyzyldy.
"Býkovskiidi qorǵaýǵa arnalǵan Batystaǵy belsendi kampaniiadan keiin 1966 jyly tamyz aiynda bosap shyqty. Ol antisovettik is-áreketke jáne qarsylyq aktsiialaryn uiymdastyrýǵa qatysqany úshin birneshe ret qamaldy" dep jazady Bi-bi-si. Býkovskiidiń 12 jyly abaqty men májbúrlep emdeitin psihiatriialyq aýrýhanada ótti.
1972 jyly Vladimir Býkovskiidi 7 jylǵa sottap, bes jyl aidaýǵa jiberdi. 1976 jyly Býkovskiige bostandyq suraǵan halyqaralyq kampaniianyń nátijesinde sovet ókimeti ony Chili kompartiiasynyń jetekshisi Lýis Korvalanǵa aiyrbastaýǵa kelisti.
