Britandyq investorlar Astana gaz qubyryn tartý qurylysyna qyzyǵýshylyq tanytyp otyr, dep habarlaidy "Ult Aqparat" QR Syrtqy ister ministri Qairat Ábdirahmanovqa silteme jasap.
«Syrtqy ister ministrligi birqatar indýstriialyq ortalyq pen elordany gazben jabdyqtaýǵa qosatyn jańa gaz qubyry jobasyna investitsiia tartýǵa kómektesetin bolady. Qazirgi ýaqytta britandyq investorlardan naqty usynys bar», - dep jazady ministr «Kazahstanskaia pravda» gazetiniń búgingi nómirinde jaryq kórgen baǵdarlamalyq maqalasynda.
Qairat Ábdirahmanovtyń atap ótýinshe, Qazaqstanda infraqurylymdyq jobalardyń basty kúrdeliligi jer shalǵailyǵymen bailanysty. Sondyqtan olar naqty tehnikalyq esepteýler men halyqaralyq teń qarjylandyrýdy qajet etedi. Sonymen qatar onyń aitýynsha, mýnitsipaldy, ónerkásiptik jáne jeke sektorlardy gazǵa kóshirý energiia tiimdiligin arttyrýǵa jáne klimat ózgerýiniń turaqtylyǵyn qamtamasyz etýge septigin tigizedi. Bul Qazaqstannyń birqatar halyqaralyq qarjy institýttarymen yntymaqtastyǵynyń basymdyǵy sanalady.
«Astana, Qaraǵandy, Temirtaý jáne Jezqazǵan qalalarynyń turǵyndary Memleket basshysynyń bastamasyn zor qýanyshpen qabyldaǵanyna senimim mol», - dep atap ótedi Syrtqy ister ministri.
5 naýryzda Qazaqstan Prezidenti Nursultan Nazarbaev «Prezidenttiń bes áleýmettik bastamasy» atty halyqqa úndeýin jariia etti. Besinshi bastama eldi gazben qamtamasyz etýdi jalǵastyrýdy kózdeidi. Atap aitqanda Qaraózek (Qyzylorda oblysy) - Jezqazǵan-Qaraǵandy-Temirtaý-Astana baǵytynda magistraldi gaz qubyryn salý jobasyn júzege asyrýdy qarastyrady.
