Britandyq hirýrgter bastary qosylyp ketken pákistandyq siam egizderin ekige bólý otasyn sátti aiaqtaǵanyn málim etti, dep habarlaidy QazAqparat.
The Guardian gazetiniń jazýynsha, 50 saǵatqa sozylǵan kúrdeli ári kóp satyly ota Londonnyń aldyńǵy qatarly balalar aýrýhanalarynyń birinde jasalǵan. Buǵan ártúrli salalardyń 100-den astam mamany qatysty. Olardyń qatarynda kásibi dárigerler men bioinjenerler bar.
Haiber-Pahtýnhva provintsiiasynyń Charsadda qalasynan kelgen eki jasar Safa men Marva bas súiekteri qosylyp týǵan, qan taratý joldary da ortaq. Basylymda habarlanǵandai, egizderdi ajyratý týraly baǵdarlama ótken jyldyń sońynda bastalyp, birneshe kezeńmen ótkizilgen. Alǵashqy ota 2018 jyldyń qazan aiynda jasaldy. Ol kezde qyzdar nebári 19 ailyq bolǵan. Ekinshi ota eki aidan keiin ótkizilgen. Alaida apaly-sińlili tek aqpan aiynda ótkizilgen jeti saǵattyq otadan keiin ǵana tolyqtai ekige ajyraǵan.
