بريتاندىق حيرۋرگتەر باستارى قوسىلىپ كەتكەن پەكٸستاندىق سيام ەگٸزدەرٸن ەكٸگە بٶلۋ وتاسىن سەتتٸ اياقتاعانىن مەلٸم ەتتٸ, دەپ حابارلايدى قازاقپارات.
The Guardian گازەتٸنٸڭ جازۋىنشا, 50 ساعاتقا سوزىلعان كٷردەلٸ ەرٸ كٶپ ساتىلى وتا لوندوننىڭ الدىڭعى قاتارلى بالالار اۋرۋحانالارىنىڭ بٸرٸندە جاسالعان. بۇعان ەرتٷرلٸ سالالاردىڭ 100-دەن استام مامانى قاتىستى. ولاردىڭ قاتارىندا كەسٸبي دەرٸگەرلەر مەن بيوينجەنەرلەر بار.
حايبەر-پاحتۋنحۆا پروۆينتسيياسىنىڭ چارساددا قالاسىنان كەلگەن ەكٸ جاسار سافا مەن مارۆا باس سٷيەكتەرٸ قوسىلىپ تۋعان, قان تاراتۋ جولدارى دا ورتاق. باسىلىمدا حابارلانعانداي, ەگٸزدەردٸ اجىراتۋ تۋرالى باعدارلاما ٶتكەن جىلدىڭ سوڭىندا باستالىپ, بٸرنەشە كەزەڭمەن ٶتكٸزٸلگەن. العاشقى وتا 2018 جىلدىڭ قازان ايىندا جاسالدى. ول كەزدە قىزدار نەبەرٸ 19 ايلىق بولعان. ەكٸنشٸ وتا ەكٸ ايدان كەيٸن ٶتكٸزٸلگەن. الايدا اپالى-سٸڭلٸلٸ تەك اقپان ايىندا ٶتكٸزٸلگەن جەتٸ ساعاتتىق وتادان كەيٸن عانا تولىقتاي ەكٸگە اجىراعان.
