Postkeńestik shielenister jáne saiasat boiynsha sarapshy, jýrnalist Nil Ýotsonnyń pikirinshe, beibit miting pen jiyn uiymdastyrý jáne ótkizý tártibi týraly jańa zań Qazaqstannyń saiasi ómirine kúrdeli ózgeris ákelmek. Ol bul týraly QazAqparat tilshisine bergen suhbatynda aitty.
Nil Ýotsonnyń pikirinshe, bul - 30 jyldai ýaqyt buryn Sovet odaǵy ydyrap, táýelsizdikke qol jetkizgen postkeńestik memleketterge úlgi bolatyn, maqtaýǵa turarlyq qadam.
«Birinshiden, bul týraly Qasym-Jomart Toqaev Qazaqstan Prezidenti bolyp sailanǵannan keiin 2019 jyldyń qyrkúieginde halyqqa Joldaýynda málim etti. Demek Memleket basshysy - senim artýǵa turatyn istiń adamy.
Ekinshiden, Qazaqstan mundai zań jobasyn Qylmystyq kodekste bekitý arqyly batys úlgisinde saiasi áralýandylyqqa bir taban jaqyndap, azamattarynyń quqyqtaryn keńeite tústi. Saiasi kelispeýshilik pen qarsylyq 1995 jyldan beri múmkin bolǵany týraly da aita ketken jón.
Jańa zańda beibit miting ótkizýge ruqsat etilip, úkimettik qurylymdar olardy qoldaýǵa mindetti ekendigi aitylady. Sonymen qatar jumys oryndarynda piketter uiymdastyrýǵa bolady delingen. Demonstratsiia arnaiy bólingen úsh jerdiń birinde ótkizilip, keminde úsh kún buryn eskertilýi kerek. Sondai-aq onyń uiymdastyrýshylary narazylyq sharasynyń maqsaty týraly naqty ári anyq jariia etýi tiis», - deidi Nil Ýotson.
Onyń aitýynsha, «Halyq únine qulaq asatyn memleket» tujyrymdamasy batys qundylyǵyna negizdelgen.
«Prezident Qasym-Jomart Toqaev inaýgýratsiialyq Joldaýynda órkeniet qundylyqtaryna negizdelgen «Halyq únine qulaq asatyn memleket» tujyrymdamasy týraly birneshe ret aitty. Bul zań - jańa Prezidenttiń tyńnan túren sala biletinin jáne demokratiianyń jaqtaýshysy ekendigin aiqyndaidy», - deidi Nil Ýotson.
Nil Ýotson - britaniialyq Kardiff ýniversiteti jýrnalistika fakýltetiniń túlegi, Kenterberi ýniversitetiniń magistratýrasyn támamdaǵan. Óziniń jýrnalistik jáne redaktorlyq qyzmeti aiasynda negizinen halyqaralyq saýda, biznes jáne mádeniet taqyryptarynda britaniialyq basylymdarda qalam terbep, Taýly Qarabah qaqtyǵysy boiynsha birneshe zertteý júrgizgen.
