9 qyrkúiekte Ulybritaniia patshaiymy Elizaveta II úkimetke Eýropa odaǵy quramynan Eýroodaqpen kelisim jasamai jáne ony parlament maquldamai shyǵýǵa tyiym salatyn zańǵa qol qoidy. Bul zań úkimetti 18 qazanda ótetin Eýropa keńesi otyrysynda Eýroodaqpen kelisimge qol jetkizýge mindetteidi. Eger Briýssel London usynǵan kelisim jobasyna kelispese, onda britan premer-ministri 2020 jylǵy 31 qańtarǵa deiin mursat berýin suraýy kerek, - dep habarlaidy Reuters.
Áýelde Ulybritaniia Eýropa odaǵynan 2019 jylǵy 29 naýryzda shyǵyp ketpekshi bolǵan. Biraq ol merzimge deiin odaq quramynan shyǵý sharttaryn ázirlep úlgermegen edi. Sáýirde Briýsselde ótken Eýropa odaǵynyń kezekten tys sammitynda odaqqa múshe 27 el Londonǵa 31 qazanǵa deiin mursat berýge kelisken.
Aǵylshyn úkimetiniń jańa basshysy Boris Djonson kelisim bolsa da, bolmasa da Ulybritaniia 31 qazannan qalmai Eýroodaq quramynan shyǵady dep málimdegen.
Britan parlamenti qazannyń ortasyna deiin demalysqa shyǵady.
Ulybritaniiada 2016 jyly maýsymda ótken referendým qorytyndysy boiynsha, el azamattary memlekettiń Eýropa odaǵy quramynan shyqqanyn (Brexit) qalaitynyn bildirgen (sailaýshylardyń 51,89 paiyzy qoldap, 48,11 paiyzy - qarsy daýys bergen).
Eýroodaqtan shyǵýǵa qarsylyq bildirýshi azamattar Brexit boiynsha ekinshi referendým ótkizýdi talap etip birneshe ret sherý ótkizgen.
