9 قىركٷيەكتە ۇلىبريتانييا پاتشايىمى ەليزاۆەتا II ٷكٸمەتكە ەۋروپا وداعى قۇرامىنان ەۋرووداقپەن كەلٸسٸم جاساماي جەنە ونى پارلامەنت ماقۇلداماي شىعۋعا تىيىم سالاتىن زاڭعا قول قويدى. بۇل زاڭ ٷكٸمەتتٸ 18 قازاندا ٶتەتٸن ەۋروپا كەڭەسٸ وتىرىسىندا ەۋرووداقپەن كەلٸسٸمگە قول جەتكٸزۋگە مٸندەتتەيدٸ. ەگەر بريۋسسەل لوندون ۇسىنعان كەلٸسٸم جوباسىنا كەلٸسپەسە, وندا بريتان پرەمەر-مينيسترٸ 2020 جىلعى 31 قاڭتارعا دەيٸن مۇرسات بەرۋٸن سۇراۋى كەرەك, - دەپ حابارلايدى Reuters.
ەۋەلدە ۇلىبريتانييا ەۋروپا وداعىنان 2019 جىلعى 29 ناۋرىزدا شىعىپ كەتپەكشٸ بولعان. بٸراق ول مەرزٸمگە دەيٸن وداق قۇرامىنان شىعۋ شارتتارىن ەزٸرلەپ ٷلگەرمەگەن ەدٸ. سەۋٸردە بريۋسسەلدە ٶتكەن ەۋروپا وداعىنىڭ كەزەكتەن تىس سامميتىندا وداققا مٷشە 27 ەل لوندونعا 31 قازانعا دەيٸن مۇرسات بەرۋگە كەلٸسكەن.
اعىلشىن ٷكٸمەتٸنٸڭ جاڭا باسشىسى بوريس دجونسون كەلٸسٸم بولسا دا, بولماسا دا ۇلىبريتانييا 31 قازاننان قالماي ەۋرووداق قۇرامىنان شىعادى دەپ مەلٸمدەگەن.
بريتان پارلامەنتٸ قازاننىڭ ورتاسىنا دەيٸن دەمالىسقا شىعادى.
ۇلىبريتانييادا 2016 جىلى ماۋسىمدا ٶتكەن رەفەرەندۋم قورىتىندىسى بويىنشا, ەل ازاماتتارى مەملەكەتتٸڭ ەۋروپا وداعى قۇرامىنان شىققانىن (Brexit) قالايتىنىن بٸلدٸرگەن (سايلاۋشىلاردىڭ 51,89 پايىزى قولداپ, 48,11 پايىزى - قارسى داۋىس بەرگەن).
ەۋرووداقتان شىعۋعا قارسىلىق بٸلدٸرۋشٸ ازاماتتار Brexit بويىنشا ەكٸنشٸ رەفەرەندۋم ٶتكٸزۋدٸ تالاپ ەتٸپ بٸرنەشە رەت شەرۋ ٶتكٸزگەن.
