Britan parlamentiniń lordtar palatasynda Abai Qunanbaiulynyń 175 jyldyǵyna orai qazaqtyń uly aqyny jáne oishylynyń murasy talqylandy, dep habarlaidy "Ult aqparat".
Onlain-kezdesýdiń qatysýshylary Abai shyǵarmalarynyń Batys pen Shyǵys mádenietteri arasynda rýhani kópir bola bilgendigin jáne áli kúnge deiin ózekti ekendigin atap ótti.
Sharaǵa Britan parlamenti Qaýymdar palatasynyń depýtattary, sondai-aq Ulybritaniianyń Tsifrlandyrý, mádeniet, buqaralyq aqparat quraldary jáne sport máseleleri boiynsha memlekettik ministri Djon Ýittingdeil qatysty. Elimizdiń atynan Qazaqstan Respýblikasynyń Mádeniet jáne sport ministri Aqtoty Raiymqulova jáne Qazaqstannyń Ulybritaniiadaǵy elshisi Erlan Ydyrysov sóz sóiledi.
Lordtar palatasynyń múshesi jáne «Konservativtik partiiadaǵy Eýraziia dostary» uiymynyń Prezidenti lord Piter Lilli Abai da Shekspir siiaqty óz zamanynyń qaitalanbas tulǵasy bola bilgendigin jáne shyǵarmalary ózektiligin joǵaltpaǵandynyn tilge tiek etti. «Abai eńbekterimen tanysyp, erekshe áser aldym. Onyń tikelei qazaqshadan aǵylshynshaǵa jańasha aýdarylǵan shyǵarmalar jinaǵy maǵan qatty unady. Tárjimashylardy bul jetistigimen quttyqtaimyn. «Óldi deýge bola ma aityńdarshy, ólmeituǵyn artynda iz qaldyrǵan» degen óleń joldary bar shyǵarmaǵa tánti boldym. Bul sózder Abaidyń ózine de arnalǵan siiaqty», dedi ol.
Qazaqstan Respýblikasynyń Mádeniet jáne sport ministri Aqtoty Raiymqulova: «Uly aqynnyń 175-jyldyq mereitoiynyń halyqaralyq masshtabta ótkizýdegi eń mańyzdy mindetterdiń biri Abai shyǵarmashylyǵyn álem halqyna nasihattaý. Osyǵan orai mereitoi qarsańynda Abaidyń óleńderi men qarasózderi 10 shet tilderine, sonyń ishinde frantsýz, aǵylshyn, arab, ispan, qytai, japon, nemis, italiia, túrik, orys tilderine aýdarylyp, aýdarylǵan elder tilinde taratý josparlanyp otyr», dep túiindedi óz sózin.
Kezdesý tek mádeni ǵana emes, eki el arasyndaǵy kommertsiialyq bailanystardy nyǵaitý taqyrybyn da qamtydy. Ulybritaniianyń biznes, energetika jáne ónerkásip strategiiasy máseleleri boiynsha memlekettik ministri Pol Skalli Qazaqstannyń Birikken Koroldik úshin saýda-investitsiialyq salalar boiynsha mańyzdy saýda áriptesi bolyp qala beretinin atap ótti.
