Ulybritaniia syrtqy ister ministri Liz Trass
Ulybritaniia syrtqy ister ministrligi 22 qańtarda jariialaǵan málimdemesinde Kremldiń Ýkrainada bilikke reseishil saiasatkerdi ákelý operatsiiasyn daiyndap jatqany aitylǵan, dep habarlaidy Azattyq.
"Resei biligi Kievtegi ókimet basyna reseishil saiasatkerdi ákelmekshi ekeni jaily aqparat aldyq" dep jazylǵan málimdemede. Buǵan qosa Resei basshylyǵy "Ýkrainaǵa shabýyldap, okkýpatsiialaý jóninde oilanyp otyrǵany" aitylǵan.
Ulybritaniia syrtqy ister ministeri Liz Trass bul aqparatty qaidan alǵanyn naqtylamady. Osy elde shyǵatyn The Daily Mail tabloidynyń jazýynsha, Kreml jospary MI-6 arnaiy qyzmetine belgili bolǵan.
Bilikten úmiti bar kandidattardyń biri – Joǵarǵy radanyń burynǵy depýtaty ári Aimaqtar partiiasynyń burynǵy múshesi Evgenii Mýraev. Britan syrtqy ister ministrligi málimdemesinde sonymen birge reseilik barlaý ýkrainalyq birneshe iri saiasatkermen bailanysta ekenin aitady. Olar – burynǵy premer-ministr Nikolai Azarov, burynǵy vitse-premerler Sergei Arbýzov pen Andrei Kliýev, ulttyq qaýipsizdik jáne qorǵanys keńesi hatshysynyń burynǵy orynbasary Vladimir Sivkovich.
Liz Trass Reseidi jaǵdaidy shielenistirmeýge, Ýkrainaǵa qarsy "agressiia naýqany" men jalǵan aqparat taratýdy doǵarýǵa shaqyrdy.
Oǵan jaýabynda Resei syrtqy ister ministrligi Ulybritaniianyń ózin jalǵan aqparat taratyp otyr dep aiyptady. Ministrlik resmi telegram-kanalynda britandyq áriptesterin "ushqary sóz taratýdy doǵaryp, tatar-mońǵol ezgisi tarihyn zertteýge den qoiýǵa" shaqyrǵan.
Forin-ofis málimdemesinde Máskeý biligi Ýkraina basshylyǵyna ákelgisi keletin reseishil kandidattyń biri retinde ataǵan Evgenii Mýraev "Strana.ua" basylymyna bergen kommentariiinde Kremldiń josparyna qatysy baryn teristedi.
"Medvedchýkpen arazdasqanyma bailanysty 2018 jyly Resei maǵan sanktsiia salǵan. Otbasymnyń ondaǵy (Reseidegi) aktivteri buǵattalǵan. Britan arnaiy qyzmeti men Forin-ofistiń Resei meni "okkýpatsiialyq úkimet" basshysy etip taǵaiyndaǵysy keledi-mis degenimen munyń qalai qabysatynyn mister Binnen suraý kerek shyǵar" dep jaýap bergen ol.
Resei áskeri Ýkrainaǵa basyp kirýi múmkin degen boljamdar 2021 jyldyń kúzinen beri talqylanyp keledi. Baspasóz quraldary Resei Ýkrainamen shekaraǵa áskerin shoǵyrlandyryp jatqanyn habarlap, Resei shabýylynyń jospary jaily boljamdar jariialaǵan. AQSh pen Eýropa elderi eger Resei áskeri Ýkraina shekarasynan ótetin bolsa qatań sanktsiia engizýge ázir ekenin málimdegen. Máskeý soǵysqa daiyndalyp jatpaǵanyn, áskerdi jattyǵý ótkizýge aparǵanyn aitqan.
