Braziliianyń Rio-de-Janeiro shtatyndaǵy Petropolis qalasynda tolassyz jańbar jaýyp, saldarynan kóshkin boldy. Tabiǵi apattan kem degende 117 adam qaza tapty, dep habarlaidy QazAqparat Deutsche Wellebasylymyna silteme jasap.
Petropoliste úsh saǵat ishinde 29 santimetrden astam jańbyr jaýyp, 80-ge jýyq úi qirady. Bilik 110-nan astam adam áli kúnge deiin habar-osharsyz ketti dep málimdedi. Rio-de-Janeirodan soltústikke qarai ornalasqan qala tanymal týristik ortalyq sanalady.
Braziliia prezidenti Jair Bolsonarý óńirdegi qozǵalysty qalpyna keltirýge kómektesý úshin federaldy qarajat bólinetinin aitty. Ol, sondai-aq Twitter-de qaiǵyly jaǵdai týraly jazyp, jańbyrdan zardap shekkender úshin duǵa etýdi usyndy.
«Jaǵdai soǵys kezindegidei... kólikter tóńkerilip, baǵanalarǵa ilinip tur, aýdarylyp jatyr, kir men sý kóp», - dedi Rio-de-Janeiro gýbernatory Klaýdio Kastro.
Petropolis meriiasy úsh kúndik aza tutý jariialady, óitkeni 700-den astam adam úilerin tastap ketýge májbúr bolǵan. Olar mektepter men ýaqytsha baspanalarǵa kóshirildi.
Órt sóndirý qyzmeti men jergilikti azamattyq qorǵanys jasaqtary tiri qalǵandardy táýlik boiy izdep jatyr.
Mundai jaýyn-shashyn Petropoliste sońǵy ret 1932 jyly bolǵan.
