Braziliia úkimeti Amazoniiadaǵy alapat orman órtin sóndirýge «Úlken jetilik» usynǵan qarjydan bas tartatynyn málimdedi, dep habarlaidy «QazAqparat» VVS-ge silteme jasap.
Frantsiia prezidenti Emmanýel Makron «Úlken jetilik» Braziliiaǵa 22 mln dollar usynýǵa ázir ekenin bildirgen bolatyn. Biraq Braziliia biligi kómekten bas tartý sebebin túsindirgen joq.
Braziliia qorǵanys ministri Amazoniiadaǵy órt baqylaýda ekenin aitty. Al Braziliia prezidenti ákimshiliginiń basshysy Oniks Lorenzoni Globo-ǵa bergen suhbatynda: «Rahmet, árine, biraq bul qarajatty Eýropadaǵy ormandardy qalpyna keltirýge jumsaǵan durys edi», - degen.
Braziliiada jalyn qushaǵynda qalǵan orman aýmaǵy rekordtyq deńgeige jetken. Ótken aptada Makron Amazoniia apatyn halyqaralyq daǵdarys dep sipattady.
Ótken aptada bilik órtti sóndirýge armiiany jumyldyrdy. 44 myń áskeri qyzmetshi Amazoniia aimaǵyna jiberilgen.
Braziliiada qazir qurǵaq maýsym. Bul kezde Ońtústik Amerikada jyl saiyn orman órtenedi. Biraq biyl tilsiz jaý byltyrǵdan 85% úlken aýmaqty jalmap otyr. Ony spýtnikten alynǵan sýretter de kórsetti.
Aita keteiik, Jer betindegi eń iri tropikalyq orman osy Amazoniia aimaǵynda. Orman birneshe eldiń aýmaǵyn qamtidy, biraq kóp bóligi Braziliianyń úlesinde.
Amazoniianyń Jerdegi klimatty saqtaýdaǵy orny orasan zor. Ný ormannyń kómirtegini jutyp, ottegi shyǵaratyn qasietine bola ǵalymdar ony «Ǵalamshardyń ókpesi» dep ataidy. Munda ósimdikter men janýarlardyń úsh millionnan astam túri bar, budan bólek, millionǵa jýyq baiyrǵy halyq ókilderi de osy ormandy mekendeidi.
Dúisenbi kúni gollivýd akteri Leonardo Di Kaprio Amazoniiadaǵy orman órtin sóndirýge 5 mln dollar bóletinin málimdedi.
