برازيلييا ٷكٸمەتٸ امازونيياداعى الاپات ورمان ٶرتٸن سٶندٸرۋگە «ٷلكەن جەتٸلٸك» ۇسىنعان قارجىدان باس تارتاتىنىن مەلٸمدەدٸ, دەپ حابارلايدى «قازاقپارات» ۆۆس-گە سٸلتەمە جاساپ.
فرانتسييا پرەزيدەنتٸ ەممانۋەل ماكرون «ٷلكەن جەتٸلٸك» برازيليياعا 22 ملن دوللار ۇسىنۋعا ەزٸر ەكەنٸن بٸلدٸرگەن بولاتىن. بٸراق برازيلييا بيلٸگٸ كٶمەكتەن باس تارتۋ سەبەبٸن تٷسٸندٸرگەن جوق.
برازيلييا قورعانىس مينيسترٸ امازونيياداعى ٶرت باقىلاۋدا ەكەنٸن ايتتى. ال برازيلييا پرەزيدەنتٸ ەكٸمشٸلٸگٸنٸڭ باسشىسى ونيكس لورەنزوني Globo-عا بەرگەن سۇحباتىندا: «راحمەت, ەرينە, بٸراق بۇل قاراجاتتى ەۋروپاداعى ورمانداردى قالپىنا كەلتٸرۋگە جۇمساعان دۇرىس ەدٸ», - دەگەن.
برازيلييادا جالىن قۇشاعىندا قالعان ورمان اۋماعى رەكوردتىق دەڭگەيگە جەتكەن. ٶتكەن اپتادا ماكرون امازونييا اپاتىن حالىقارالىق داعدارىس دەپ سيپاتتادى.
ٶتكەن اپتادا بيلٸك ٶرتتٸ سٶندٸرۋگە ارمييانى جۇمىلدىردى. 44 مىڭ ەسكەري قىزمەتشٸ امازونييا ايماعىنا جٸبەرٸلگەن.
برازيلييادا قازٸر قۇرعاق ماۋسىم. بۇل كەزدە وڭتٷستٸك امەريكادا جىل سايىن ورمان ٶرتەنەدٸ. بٸراق بيىل تٸلسٸز جاۋ بىلتىرعدان 85% ٷلكەن اۋماقتى جالماپ وتىر. ونى سپۋتنيكتەن الىنعان سۋرەتتەر دە كٶرسەتتٸ.
ايتا كەتەيٸك, جەر بەتٸندەگٸ ەڭ ٸرٸ تروپيكالىق ورمان وسى امازونييا ايماعىندا. ورمان بٸرنەشە ەلدٸڭ اۋماعىن قامتيدى, بٸراق كٶپ بٶلٸگٸ برازيلييانىڭ ٷلەسٸندە.
امازونييانىڭ جەردەگٸ كليماتتى ساقتاۋداعى ورنى وراسان زور. نۋ ورماننىڭ كٶمٸرتەگٸنٸ جۇتىپ, وتتەگٸ شىعاراتىن قاسيەتٸنە بولا عالىمدار ونى «عالامشاردىڭ ٶكپەسٸ» دەپ اتايدى. مۇندا ٶسٸمدٸكتەر مەن جانۋارلاردىڭ ٷش ميلليوننان استام تٷرٸ بار, بۇدان بٶلەك, ميلليونعا جۋىق بايىرعى حالىق ٶكٸلدەرٸ دە وسى ورماندى مەكەندەيدٸ.
دٷيسەنبٸ كٷنٸ گولليۆۋد اكتەرٸ لەوناردو دي كاپريو امازونيياداعى ورمان ٶرتٸن سٶندٸرۋگە 5 ملن دوللار بٶلەتٸنٸن مەلٸمدەدٸ.
