Mánerlep syrǵanaý jankúierleriniń qýanyshynda shek joq - qazaqstandyq Elizabet Tursynbaeva álemde tuńǵysh bolyp eresekter arasynda taza tórttik sekirý (salhov) jasap, óz atyn tarihta qaldyrdy jáne Japoniiada ótken Álem chempionatynyń kúmis júldesin jeńip aldy, dep habarlaidy QazAqparat.
Braian Orserdiń burynǵy shákirti, búginde Eteri Týtberidzeniń qol astynda jattyǵyp júrgen Elizabet daiyndyq kezinde-aq tórttik salhovtyń kaskadyn - úshtik týlýp jasaǵan, osylaisha Japoniiadaǵy Álem chempionatynan mol úmit kúttirgen edi. Bul kaskadty jarysta jalǵastyrǵan qazaqstandyq figýrist eresek áielder arasynda jupsyz mánerlep syrǵanaýda tórttik salhov jasaǵan alǵashqy sportshy retinde tarihqa endi.
Elizabet Týrsynbaevanyń ónerine baǵa bergen tanymal jattyqtyrýshy Tatiana Tarasova mánerlep syrǵanaýshynyń sheberligi artyp, bul jarysta óte jaqsy óner kórsetkenin aitty. «Bravo, Tursynbaeva, bravo, Qazaqstan!», - dedi qýanysh sezimin jasyra almaǵan reseilik jattyqtyrýshy.
Elizabetti quttyqtap, qýanyshyna ortaqtasqan ártúrli elderdegi fanattar qatary saǵat sanap artyp jatyr. Elizabettiń Instagramdaǵy paraqshasynda jankúierleri aq tilegin jaýdyryp, tek qana jaqsy sózder joldaýda.
«Quttyqtaimyz! Jaraisyń! Sen sporttyń damýyna ólsheýsiz úles qostyń, sport tarihynda Qazaqstannyń esimin altyn árippen jazyp qaldyrdyń, biz seni maqtan tutamyz!», «Reseilikter atynan quttyqtaimyz. Jaraisyń, Elizabet! Bul qyz men úshin jańalyq boldy, endi men onyń jankúierimin. Onyń ónerinen kóz qýanyp, janyń rahatqa bólenedi. Mol tabys tileimin, jańa biikterdi baǵyndyr! Umytylmas sezimder úshin rahmet!», - dep jazdy jeli qoldanýshylary.
Kóptegen aqjarma tilekter men quttyqtaýlardy Elizabettiń YouTube-taǵy videolarynyń astynan kezdestirýge bolady.
«Men Lizaǵa qysqa baǵdarlamada tórttik salhov jasa dep komment jazdym. Sosyn ol shynymen de ony jasady! Netken keremet! Qazaqtar, mundai sportshyny aialańdar!», - dep jazady Evgeniia Krashenko.
«Ol úshin óte qýanyshtymyz! Halqy ony tóbesine kóterip, maqtan etse bolady. Buǵan deiin jattyqtyrýshy Eteri Týtberidzeniń osylai shattanǵanyn kórmeppiz. Ádette ol óte ustamdy adam, kóńil tolqynystaryn shákirtterine kórsetpeitin edi», - deidi japondyq Akiko Iseki.
Elizabet Tursynbaeva Instagram paraqshasynda jankúierlerine alǵys aityp, ásirese japondyq kórermenderine jiger beretin hattar jazyp, tamasha syilyqtar joldaǵany úshin rizashylyǵyn bildirdi.
Qyrǵyzstandyqtar, ázerbaijandyqtar, ózbekstandyqtar, túrikter de óz tilinde Elizabetke júrekten shyqqan lebizderin joldap, kórsetken ónerine tánti bolyp jatyr.
Elizabettiń ózi jeńisi týraly aita kele, bul kúmis medaldi kútpegenin jetkizdi.
«Árine, men óte baqyttymyn. Bul - Qazaqstannyń áielder arasyndaǵy jupsyz mánerlep syrǵanaý boiynsha alǵashqy medali», - dedi ol qorytyndy baspasóz máslihatynda.
Buǵan deiin Prezident Qasym-Jomart Toqaev mánerlep syrǵanaýshy Elizabet Tursynbaevany álem chempionatyndaǵy kúmis medalimen quttyqtaǵan bolatyn.
