Janýarlar álemine qarsy qylmystarǵa jaza kúsheitiledi. Bul týraly Parlament Májilisiniń jalpy otyrysynda qylmystyq-protsestik zańnamany jetildirý máselelerin talqylaý barysynda QR Bas prokýrorynyń orynbasary Marat Ahmetjanov málim etti, dep habarlaidy "Ult aqparat".
«Kelesi mańyzdy másele janýarlar álemine qarsy qylmystar. Bul óte ózekti. Qorshaǵan ortaǵa qarsy qylmystar qoǵamda rezonansty týdyrady. Qazir zańsyz ańshylyq, balyq, sý janýarlaryn aýlaýǵa, ósimdikterge qarsy áreketter teris qylyqtar áreketine jatady. Endi olar aýyrlyǵy orta qylmystar sanatyna kirmek. Jaza mólsheri de kúsheitiledi. Mysaly, búgin aiyppul 5 myń teńge bolsa, endi 10 mln teńgege deiin kóbeiedi. Qazir osy áreketter úshin adam 50 táýlikke qamalýy múmkin, endi tórt jyl bas bostandyǵynan aiyrýy kózdelip otyr. Eger bul qylmystar tabiǵi qoryqta jasalsa, qyzyl balyqty nemese jalpy balyqty katermen aýlasa, sirek kezdesetin Qyzyl kitapqa engen ańdardy aýlasa - 6 jyl, al asa iri kólemde nemese qylmystyq top bolsa, on jylǵa deiin bas bostandyǵynan aiyrý bekitilip otyr», - dedi M. Ahmetjanov.
Onyń sózine qaraǵanda, osyndai qylmys jolymen tapqan adamnyń bar múlki, qylmys quraldary, kóligi, qaiyqtary, myltyǵy tárkileýge jatady.
Aita keteiik, búgin jalpy otyrysta palata depýtattary «Qazaqstan Respýblikasynyń keibir zańnamalyq aktilerine qylmystyq jáne qylmystyq-protsestik zańnamany jetildirý máseleleri boiynsha ózgerister men tolyqtyrýlar engizý týraly» zań jobasy talqylanyp jatyr. Osy oraida urlyqqa qatysty áreketter aýyr qylmystar sanatyna kóshetini málim boldy.
