«Brakoner» is-sharasy barysynda zańsyz ań aýlaýdyń 1 983 faktisi anyqtaldy. Bul týraly QR IIM resmi ókili Nurdildá Oraz málim etti, dep habarlaidy QazAqparat tilshisi.
«Ishki ister organdary mindetteriniń biri – tabiǵatty qorǵaý is-sharalaryna qatysý, brakonerlermen kúreste tabiǵatty qorǵaý organdaryna járdemdesý. Negizgi kúsh-jiger ekologiialyq zań buzýshylyqtardyń aldyn alýǵa baǵyttalǵan. Biologiialyq resýrstar nysandarynyń zańsyz ainalymymen, brakonerlikpen kúresý úshin elimizde qazan men qarasha ailarynda «Brakoner» jedel aldyn alý is-sharasy ótkizildi. Onyń maqsaty - tabiǵatty qorǵaý zańnamasyn buzý jáne tabiǵatty zańsyz paidalaný faktilerin anyqtaý, sondai-aq múiiz, et, teri syndy ónimderdi zańsyz satý oryndaryn, onymen ainalysatyn adamdardy anyqtaý», - dedi resmi ókil IIM baspasóz alańynda ótken brifingte.
Onyń atap ótýinshe, operatsiia júrgizilgen ailardyń ishinde politsiia qyzmetkerleri 8 myńnan astam ańshylyq jáne balyq aýlaý sharýashylyqtaryn, orman jáne janýarlar dúniesin qorǵaý memlekettik mekemeleriniń, erekshe qorshalatyn tabiǵat aimaqtaryn tekserip shyqty.
«Is-sharalardyń nátijesinde tabiǵatty qorǵaý zańnamasynyń 3,5 myń ret buzylǵany anyqtaldy. Onyń ishinde zańsyz ań aýlaýdyń - 1 983, aǵashtardy zańsyz kesýdiń – 68, zańsyz balyq aýlaýdyń – 747, jabaiy janýarlar men ósimdikterdi zańsyz satyp alý, tasymaldaý áne saqtaýdyń 21 faktisi anyqtaldy», - dedi Nurdildá Oraz.
