Energetika ministri Qanat Bozymbaev úkimet ǵimaratyndaǵy baspasóz máslihatynda benzin baǵasy jaily pikir bildirdi, - dep habarlaidy "Ult aqparat" kaz.tengrinews.kz portalyna silteme jasap.
"Biz árine, janarmai quiý beketterindegi baǵalardy qaita tirkei alamyz. Biraq munyń arty ne bolady? Janarmai quiý beketterindegi baǵalardy tirkesek, importshylar shyǵynǵa bata otyryp, munda benzin ákelmeidi. Problema týyndap, janarmai quiý beketterinde 30 paiyz defitsit bastalady. Biz mundaidan ótkenbiz. Iá, benzin qymbattaý, biraq bar. Joq benzinnen, qymbat benzin artyq. Arzan bolsa, odan da jaqsy bolar edi. Defitsit bolsa, sapasy nasharlaidy, qozǵaltqyshtar búlinedi. Sondyqtan úsh munai óńdeý zaýytyn modernizatsiialamaiynsha, Resei naryǵyna táýeldilik saqtalady", - dep málimdedi Qanat Bozymbaev.
Aitýynsha, Qazaqstan tolyqtai importty almastyrýǵa kóshse, benzin baǵasy ózgere bastaidy, sebebi ony qazaqstandyq úkimet retteidi.
"Sol kezde biz naryqqa budan da qatty áser ete alamyz. Biraq bizdiń benzin reseilik benzinnen eki ese arzan bolady deýge kelmeidi, óitkeni bizdiń baǵa reseilikten eki ese tómen bolsa, bizde benzin bolmaidy, ony Reseige alyp ketedi, sebebi bizdiń shekaramyz ashyq. Biryńǵai naryqqa kóshtik desek, eki eldiń baǵasy bir kórsetkishke jaqyn bolady, biraq aiyrmasyndaǵy tabysty qazaqstandyq zaýyttar alyp otyrady, olar salyq túrinde bul qarajatty biýdjetke qaitarady", - dedi ministr.
