Bul jóninde Ortalyq kommýnikatsiialar qyzmetinde ótken brifingte QR Energetika ministri Qanat Bozymbaev málimdedi, dep habarlaidy Baq.kz.
«Tórtinshi munai óńdeý zaýyty ázirshe salynbaidy. Nege? Sebebi, «QazMunaiGaz» eki álemdik kompaniiany tartty. Energetika ministrligi basqaryp otyrǵan jumys tobynyń jetekshiligimen bizge júrgizilgen modernizatsiianyń arqasynda naqty 2026-2027 jylǵa deiin jaqsy qor bar ekeni jóninde esep berdi. Eger, biz kommýnaldyq kólik pen basqa da kólik túrlerin gazdandyrsaq, onda bul bizge dizel otyny boiynsha 400-500 myń tonnaǵa deiin únemdeý beredi. 2030 jylǵa deiin ishki naryqqa arnalǵan jańa qýattylyqtar qajet bolmaidy», - dedi Bozymbaev.
Energetika ministri barlyq jaǵdai eldegi ekonomika ósimine bailanysty bolatynyn joqqa shyǵarmady.
«Biz belgili bir tutyný deńgeii esebinen qatań baqylaý júrgizetin bolamyz. Ishki naryqta negizgi munai ónimderin tutyný 10,5 mln tonnaǵa jetken ýaqytta jańa munai óńdeýshi zaýyt qurylysy jaiynda sóz qozǵaýǵa bolady. Alaida, keminde bes jyl ýaqyt qajet ekenin de eskerý kerek. Sol sebepti, tórtinshi munai óńdeýshi zaýyt týraly ázirshe sheshim joq», - dep túiindedi ministr.
Sonymen qatar, Bozymbaev 2018 jyly elimizdegi gaz óndirisi óskenin, aldaǵy jyldary Qarashyǵanaqqa 5 mlrd dollar investitsiia tartylatynyn jáne biyl eldi mekenderdi gazdandyrý boiynsha qansha joba iske asyrylǵanyn aitqan bolatyn.
