Almaty oblysynda aýyldyq jerlerdegi sý qubyry jelileriniń tozýyn azaitý maqsatynda shamamen 760 shaqyrym jelini qaita jańartýǵa baǵyttalǵan 55 joba ázirlenýde. Bul týraly Úkimet otyrysynda Premer-Ministr Álihan Smaiylovtyń saýalyna jaýap bergen Almaty oblysynyń ákimi Qanat Bozymbaev aitty, dep habarlaidy QazAqparat.
«Aýyz sýmen qamtamasyz etýde Almaty oblysy aldyńǵy qatarda. Degenmen, sý qubyrlarynyń tozyǵy jetip tur. Bul máseleni sheshý úshin qandai sharalar qabyldap jatyrsyzdar?» - dep suraǵan edi Úkimet basshysy óńir ákiminen.
Saýalǵa jaýap bergen aimaq basshysynyń dereginshe, oblysta – 742, onyń ishinde 10 qalalyq jáne 732 aýyldyq eldi meken bar.
«Qaladaǵy halyqtyń sýmen jabdyqtaý qyzmetterine qoljetimdiligi 99,5 paiyzdy qurap otyr. Biraq, sý qubyry jelileriniń tozýy – 44 paiyz. 732 aýyldyq eldi mekenniń 669-y ortalyqtandyrylǵan sýmen qamtamasyz etilgen. 54 eldi meken lokaldy sý júiesimen qamtylǵan. 9 aýyl turǵyny tasymaldanatyn sý paidalanady. Biyl aýyldyq eldi mekenderde 16 joba iske asyrylýda. 8,4 mlrd teńge bólindi. 209,6 shaqyrym jeli salynyp, qaita jańǵyrtylatyn bolady. Sonymen qatar respýblikalyq biýdjetti naqtylaý kezinde 15 jobany iske asyrýǵa 6,1 mlrd teńgege biýdjettik ótinim usynylyp, qoldaý tapty. Nátijesinde jelilerdiń tozýy biyl 41 paiyzǵa deiin tómendeidi. Munan bólek, aýyldyq jerlerdegi shamamen 760 shaqyrym jelini qaita jańartýdy kózdeitin 55 joba ázirlenýde. Atalǵan jobalardy iske asyrý 2023-2024 jyldary qarastyrylady. Nátijesinde, jelilerdiń tozýy 41 paiyzdan 32 paiyzǵa deiin tómendeidi. Al qalalardaǵy jelilerdi qaita jańartýǵa 13 jobalyq-smetalyq qujat ázirlenýde. Osy jobalardy iske asyrý jelilerdiń tozýyn 44 paiyzdan 38 paiyzǵa deiin kemitedi», - dedi Qanat Bozymbaev.
