Qazaqstan 2030-2040 jyldary munai óndirý kólemin 100 mln tonnaǵa jetkizedi. Bul týraly búgin elordada ótip jatqan «Kazakhstan Global Investment Roundtable» forýmynan tys BAQ ókilderine suhbat bergen QR Energetika ministri Qanat Bozymbaev aitty, dep habarlaidy QazAqparat.
«Ózderińiz bilesizder, 2030-2040 jyldary Batys Eýropa elderi men Qytai elektromobilderge kóshetindigin aitýda. Sondyqtan aldaǵy 20 jylda janar-jaǵarmai retindegi óńdelgen munai óz baǵasyn aqtamaidy. Al biz dál sol kezeńde 100 million tonnadan astam munaidy óndiretin bolamyz. Baǵa tiimsiz bolsa, onda ol ónimdi qai jaqqa jiberemiz? Eń bastysy, Prezidentimiz ben Úkimetimizdiń tapsyrmasyna sáikes, munai jáne gaz-himiia salasyn damytatyn bolamyz», - dedi Bozymbaev.
Onyń aitýynsha, qazirdiń ózinde bul baǵytta jumystar júrgizilý ústinde. Atyraý oblysynda tiisti ekonomikalyq aimaq damytylýda. Atalǵan aimaqtyń infraqurylymyn «Samuryq-Qazyna» ál-aýqat qory ázirleý ústinde.
«Oǵan 300 milliardtan astam qarjy salyndy. Temirjol, sýmen qamtamasyz etý, elektr jabdyqtaryn qamtamasyz etý jáne tiisti elektrostansa salý jumystary atqarylýda. Al ol jerde qandai jobalardy júzege asyramyz? Birinshiden, polipropilen shyǵaratyn zaýyt salynady. Oǵan 2,5 milliardtan astam investitsiia salynatyn bolady. Investitsiia Qytai banki tarapynan keledi. Biyl bári durys bolsa «Samuryq-Qazynaǵa» qarasty kompaniia sol jumystardy bastaidy. Kelesi jylda polietilen dep atalatyn taǵy bir úlken jobany júzege asyrý oiymyzda bar. Ony dúniejúzindegi eń iri 4 kompaniianyń qataryna kiretin avstriialyq kompaniiamen birge júzege asyramyz dep josparlaýdamyz. Aldyn ala kelisim bar. Kelesi jyldyń naýryz aiynda tiisti sheshim qabyldaityn bolamyz. Jobanyń jalpy somasy 6,5 mlrd dollardan astam», - dedi Qanat Bozymbaev.
Sonymen qatar ministrdiń dereginshe, Atyraý arnaiy ekonomikalyq aimaǵynda júzege asyrylýy múmkin 5-6 joba ázirlenýde. Qazirgi ýaqytta olarǵa investor izdeý jumystary júrgizilip jatyr.
