Tekelide lai kóshkininen zardap shekkenderge baspana beriledi. Bul týraly Almaty oblysynyń ákimi Qanat Bozymbaev Twitter-degi paraqshasynda habarlady.
«Búgin Tekelide lai kóshkini júrdi. Birneshe jekemenshik turǵyn úi búlindi. Ókinishke orai, 2016 jyly týǵan qyz bala qaitys boldy. Jedel qyzmetter óz jumystaryn júrgizýde. Zardap shekkenderge baspana berilip, kómek kórsetiledi. Marqumnyń jaqyndaryna qaiǵyra kóńil aitamyn», - dep jazdy Almaty oblysynyń ákimi.
Búgin túski saǵat 13:00 shamasynda Tekelidegi Qonaev kóshesinde lai kóshkini júrip, bes jastaǵy qyz bala joǵalyp ketti. Keshki saǵat 18.15-te balanyń máiiti laily úiindi astynan tabyldy.
Almaty oblystyq Tótenshe jaǵdailar departamentiniń aldyn ala aqparatyna sáikes, Tekeli qalasyndaǵy lai kóshkini 50 metrge deiin aqqan, eni - 25 metr, biiktigi - 3,5 metr, kólemi - 4375 tekshe metr.
Bir jeke turǵyn úi qirap, bir úi balshyqtyń astynda qaldy. Turǵyn úilerdiń taǵy tórteýiniń aýlasyna balshyq kirdi jáne Qonaev kóshesin basyp tastady. Qaza bolǵan 5 jasar baladan basqa turǵyndar qaýipsiz jerde.
