Úkimette Astanaǵa gaz qubyryn tartý jáne bul jobany arzandatý joldary talqylanyp jatyr. Bul týraly OKQ-de ótken baspasóz máslihatynda QR energetika ministri Qanat Bozymbaev aitty, dep habarlaidy "Ult aqparat" Sputnik Qazaqstan agenttigine silteme jasap.
"Astanaǵa gaz jetkizý máselesi talai ret talqylandy. "QazTransGaz" kompaniiasy "Saryarqa" gaz qubyry qurylysynyń tehnikalyq-ekonomikalyq negizdemesin daiyndady. "Saryarqa" – Qyzylorda oblysynan bastalatyn gaz qubyry. "Beineý – Bozoi – Shymkent", odan keiin "Jezqazǵan – Qaraǵandy – Astana – Kókshetaý". Astanaǵa deiin bul alǵashqy kezeń, ol 1800 shaqyrymdy quraidy, quny - 266 mlrd teńge. Osynyń bárin eseptesek, gaz quny bir tekshe metrine Astanada 50-55 myń teńge shamasynda bolady. Salystyrmaly túrde aitsaq, Shymkentte – 30 myń teńge", — dedi ministr.
Sonymen qatar, Bozymbaev gaz qubyry 3 mlrd tekshege eseptelgenin atap ótti.
"3 mlrd tekshege Qaraǵandy oblysy men Astananyń otyn-energetikalyq kesheni kiredi. Eger biz Astana JEO-laryn gazǵa aýystyratyn bolsaq, onda Ekibastuzdyń arzan kómirimen salystyrǵanda jylý baǵasy 40-50 paiyzǵa, al elektr energiiasynyń quny eki esege joǵary bolatynyn túsinýimiz kerek. Sol sebepti qazir úkimette uzaq merzimdi qarjylandyrýdy qalai tartý jáne bul jobany arzandatý joldary talqylanyp jatyr. Sebebi óńirlerdiń ekologiiasyn jaqsartamyz dep júrip, turmysy tómen azamattardyń qaltasyna salmaq túsirmeýimiz kerek", — dedi ol.
Bozymbaev bul máselege qatysty sheshim jyl sońyna deiin qabyldanatynyn aitty.
"Úkimettiń tiisti sheshimimen keiinge qaldyrylady nemese kelesi jyly iske asatynyn habarlaimyz", — dedi ministr.
