Almaty oblysy ákimi Qanat Bozymbaev "Altyn orda" bazarynda tekserý jumystary qalai júrgizilgenin aitty. Onyń sózinshe, bazarda sanitarlyq, ekologiialyq, qurylys, tótenshe jaǵdai normalary buzylǵan, dep habarlaidy Sputnik Qazaqstan.
Bozymbaev kásipker Armanjan Baitasovqa bergen suhbatynda prezident eki ai buryn bergen tapsyrmanyń qalai oryndalyp jatqanyn aitty.
"Altyn orda" bazaryna eki JShS men bir JK ielik etedi. Jalpy alǵanda barlyǵy Bolat Nazarbaevtyń (Qazaqstannyń Tuńǵysh Prezidenti Nursultan Nazarbaevtyń inisi – Sputnik) otbasyna tiesili: uly, týystary basqarady. Eki ai buryn prezident bazarda tártip ornatý boiynsha tapsyrma berdi. Ókinishke qarai biz onyń ishine birden kire almadyq, sebebi ol jerdi basqaratyndardyń bári shaǵyn jáne orta biznes dep kórsetilgen. Shema solai qurylǵan. Al bizde shaǵyn jáne orta biznesti tekserýge moratorii engizilgen. Artynan bazardyń kóptegen jeke kásipten quralǵanyna qaramastan, onyń shaǵyn jáne orta biznes emes ekenin dáleldedik", - deidi Bozymbaev.
Aitýynsha, eldiń jańa bas prokýrory Berik Asylov jaǵdaimen tanysqan. Artynsha tekserý júrgizýge ruqsat bergen. Bazardyń jumysyn sanitarlyq-epidemiologiialyq stantsiia mamandary, sáýlettik qadaǵalaý, ekologtar, salyq boiynsha mamandar teksergen.
"Aldyn ala qorytyndysy shyqty, akt jasalǵan joq. Tekserý barysynda kóptegen buzýshylyq anyqtaldy. Sanitarlyq, ekologiialyq, qurylys, tótenshe jaǵdai normalary buzylǵan. Munda tiisti zańnyń bári buzylǵan, ishinde migratsiialyq zańnama da bar. Jaqynda taǵy bir reid júrgizdik, zańsyz júrgen 250 migrant anyqtaldy. Sondyqtan bul bazarda sózsiz tártip ornatý qajet", - dedi oblys ákimi.
Onyń sózinshe, bazar aýmaǵynda nysandardyń teń jartysy zańsyz turǵyzylǵan.
"Eń bastysy monopoliiasyzdandyrý. Bazarǵa ielik etetinder aktsiia boiynsha kelisimge kelgen soń olarǵa talap qoiamyz. Birinshisi, Almaty oblysynda, Jambyl oblysynda, Túrkistan oblysynda, jaqyn mańdaǵy Qaraǵandy oblysynda azyq-túlik óndiretin barlyq iri sharýa qojalyqtary bul bazarǵa ene alýy kerek. Keldi, qolynda qujattary men taýarynyń sertifikaty durys bolsa, bazarda oryn nemese pavilon alyp, saýda jasai alýy kerek. Ekinshisi, iri importtaýshylar. Bizge kei taýar Ózbekstan, Tájikstan, Pákistannan ákelinedi. Tipti Ekvadordan da jemister jetkiziledi. Iri importtaýshylar da bazarda saýda jasai alýy kerek. Bul taýardyń birneshe qoldan ótpei, baǵa qymbattamaýy úshin qajet", - deidi Qanat Bozymbaev.
Ákimniń sózinshe, osy bastamalar júzege asady. Qajetti normativti baza ázirlenip jatyr. Bozymabevtyń sózinshe, keleshekte "Altyn orda" bazary iri kóterme logistikalyq ortalyq retinde jumys isteýge tiis.
Aita keteri, Memleket basshysy 2022 jyldyń 8 aqpanynda eki aidyń ishinde bazarlardy deldaldardan tazartýǵa tapsyrma berdi.
"Saýda-sattyqta deldaldyqqa toqtaý salatyn kez keldi. Mysaly, 3 million adam turatyn Almaty qalasy men onyń tóńiregindegi eldi meken turǵyndary tutyný taýarlaryn kóbine "Altyn orda" bazarynan alady. Almaty oblysy men Almaty qalasynyń ákimderine úkimetpen birlesip, bazarda tártip ornatýdy tapsyramyn. Bul jer paidakúnemder úshin naǵyz "maishelpekke" ainalǵan", - dedi Toqaev Úkimettiń keńeitilgen otyrysynda.
Toqaev qajet bolsa, bul jumysqa quqyq qorǵaý organdary atsalysý qajet ekenin aitty.
