Búgin Úkimet otyrysynda Premer-Ministr Baqytjan Saǵyntaev Aqtóbe oblysyndaǵy gaz tapshylyǵy faktisi boiynsha tiisti tekserýlerdi júrgizýdi tapsyrdy, dep habarlaidy QazAqparat.
«Keshe buqaralyq aqparat quraldarynda Aqtóbe oblysynda suiytylǵan gazdyń tapshylyǵy máselesi boiynsha málimetter jariialandy. Gaz quiý stansalarynda úlken kezekter baiqalýda» dep toqtalǵan Úkimet basshysy selektorlyq bailanys arqyly Aqtóbe oblysynyń ákimi Berdibek Saparbaevtan qazirgi jaǵdaidy surady.
Óz kezeginde óńir ákimi gaz máselesi turǵysynda sońǵy eki kúnde tiisti sharalar atqarylyp jatqandyǵyn, keshe qosymsha kólemde gaz alynǵanyn atap ótti. Sonymen qatar ol ekinshi másele gaz satatyn mekemelerdiń keibireýleriniń jumysyna bailanysty ekenin jetkizdi.
«Keshe prokýratýraǵa, biýroǵa tiisti tekserýler jasaý boiynsha júgindik. Qazirgi kezde qajetti sharalar qoldanylyp jatyr. Bizdiń oiymyzsha, búginnen bastap gaz boiynsha problema bolmaýy kerek», - dedi B. Saparbaev.
Budan bólek, QR Energetika ministri Qanat Bozymbaev Aqtóbe oblysynda gazben qamtamasyz etý baǵytynda tirkelgen tórt kompaniia bar ekenin aitty.
«Ai saiyn ministrlik atalǵan oblysqa 5 200 tonna suiytylǵan gaz bóledi. Jalpy, júz paiyzyn osy tórt kompaniia alyp ketedi jáne oblysta satady. Naýryz aiynda da bes myń tonnadan astam gazdy olar satyp aldy. Biraq bul gaz qaida jiberilgenin tekserý kerek. Sondyqtan búgin eki laýazymdy qyzmetkerdi Aqtóbe oblysyna jiberdim», - dedi Q. Bozymbaev.
Osy oraida Premer-Ministr Baqytjan Saǵyntaev bul másele jyl saiyn týyndaitynyn aita kele: «Gaz nemese benzin tapshylyǵy baiqalady. Kimniń qai kólemde, qai jerge jiberiletinin jaqsy bilemiz. Qanat Aldabergenuly, kemshilikterge jol bermes úshin ákimdikpen birlese otyryp, aldyn ala jumystardy atqarý kerek. Eger de aldyn ala alǵan gazdy satpai ustap otyrsa nemese shetelge shyǵaratyndai is-qimyldar júretin bolsa, tiisti sharalar qoldaný qajet», - dedi.
