Búgin Úkimet otyrysynda energetika ministri Qanat Bozymbaev Memleket basshysynyń «Nur Otan» partiiasynyń sezinde bergen tapsyrmalaryn oryndaý boiynsha josparlanǵan sharalar týraly baiandady, dep habarlaidy "Ult aqparat" primeminister.kz saityna silteme jasap.
Q. Bozymbaev gaz taratý jelileriniń tórt jobasyn iske asyrý Astana qalasynyń 370 myń turǵynyn, Qaraǵandy oblysynyń (Qaraǵandy, Temirtaý, Jezqazǵan jáne 5 aýyl) 270 myń turǵynyn jáne Aqmola oblysynyń 100 myń turǵynyn gazben qamtamasyz etetinin atap ótti.
«Saryarqa» magistraldi gaz qubyryn salýdy eskergende atalǵan jobalardy iske asyrý óte mańyzdy, ol osy óńirlerge gaz jetkizip, shamamen 740 myń adamdy gazben qamtamasyz etýge múmkindik beredi», — dep málimdedi Q. Bozymbaev.
Budan ózge, Mańǵystaý jáne Aqtóbe oblystarynda eki magistraldi gaz qubyryn salý atalǵan óńirlerdi úzdiksiz gazben qamtamasyz etedi. Sonymen qatar, Mańǵystaý oblysynyń ózinde 130 myń turǵyndy qosymsha gazben qamtamasyz etpek.
Sonymen qatar, úsh ákelýshi gaz qubyryn jáne bir avtomattandyrylǵan gaz taratý stantsiiasyn salý kózdelgen. Sonyń nátijesinde Jambyl oblysynda 175 myń adam, Qostanai oblysynda 9 myń adam gazben qamtylady.
Elektrmen jabdyqtaý boiynsha 2019–2021 jyldar aralyǵynda birqatar nysandy rekonstrýktsiialap, salý usynylady. Olardyń ishinde — Arqalyq qalasynda JEO rekonstýktsiialaý jobasy.
«Bul joba qala úshin óte mańyzdy. Sebebi qazirgi tańda jylý elektr ortalyǵy eskirgen. Atalǵan ortalyq mazýtty qoldanǵan soń, onyń ózindik quny joǵary. Sondyqtan jyl saiyn 2 mlrd teńge kóleminde sýbsidiia bólinedi. Jylý elektr ortalyǵy kómirge aýystyrylsa, sýbsidiia bólýdi qajet etpeidi, qazyna únemdeledi. Sondai-aq, Arqalyq qalasynyń 12 myń abonentiniń elektr jáne jylýmen qamtylý sapasy artatyn bolady», — dep túsindirdi ministr.
Budan ózge, Astana, Shymkent qalalary men Mańǵystaý oblysynda elektr berý jelilerin salý kózdelgen.
