Vladimir Bojko Kásibi áskerilendirilgen avariialyq-qutqarý qyzmetteriniń respýblikalyq ortalyǵy shtabynda jańa laýazymǵa taǵaiyndaldy, dep habarlaidy "Ult aqparat".
«2021 jylǵy 1 maýsymnan bastap Vladimir Bojko Kásibi áskerilendirilgen avariialyq-qutqarý qyzmetteriniń respýblikalyq ortalyq shtaby (KÁAQQ ROSh) Baqylaý keńesi tóraǵasynyń orynbasary bolyp taǵaiyndaldy», - dep habarlady KÁAQQ ROSh baspasóz qyzmetinen.
Vladimir Bojko 1971 jyly V.I. Lenin atyndaǵy Qazaq politehnikalyq institýtyn, 1976 jyly KSRO MQK joǵary kýrstaryn bitirgen. Bilimi boiynsha mamandyǵy «taý-ken jumystaryn elektrlendirý jáne avtomattandyrý»; «jedel quram».
Buryn ár jyldary Qazaqstan Respýblikasy Ulttyq qaýipsizdik komiteti júiesinde basshylyq qyzmetterdi atqarǵan. General-leitenant ataǵy bar.
2007-2014 jyldary Vladimir Bojko Tótenshe jaǵdailar ministrligin basqardy, al 2016 jyly Májilis Tóraǵasynyń orynbasary bolyp sailandy.
Otan aldyndaǵy erekshe eńbegi úshin I dárejeli «Barys», II dárejeli «Aibyn» ordenderimen, KSRO, Qazaqstan Respýblikasy men shet elderdiń 43 medalimen marapattalǵan.
