Áleýmettik jelini ashyp qalsam: ókpe, renish, zapyran. Qazaq qoǵamy ashynǵan: qazaqtyń joǵyn joqtai almai, biraq qazaqtyń nanyn jep júrgenderge ókpesi qara qazandai. Kelmeske ketken, qazaqtyń sanasyn ýlap, basyn jalmaǵan qan tústi Qyzyl júieniń arýaǵyn tiriltkisi keletinderdi tútip jeýge daiar. Kimge renjimiz?
"Ár halyqqa ózine sai bilik beremiz" depti Jaratýshy Iemiz. Qazaqtyń áýliesi Máshhúr Júsip jetkizgen qazaq maqalynda: "Adamnyń eń azǵyny ákesin óltirgenmen dos bolady, eń jamany qatynynyń oinasymen dos bolady" delingen. Týra bizdegi jaǵdai. Alyp qosary joq. Ákemizdi óltirgen, Alash anamyzdy zorlaǵan Qyzyl júiemen dos bolý, ashyna bolý qai qisynǵa syiady? Neden sorly boldyq? Nege baǵymyz janbaidy? Nege Ata tilimiz týǵan jerinde saltanat qurmaidy? Nege? Nege? Nege? Nege áli kúnge deiin: "Ózimdiki dei almai óz malyńdy, Kúndiz kúlkiń buzyldy, túnde - uiqyń".
Jaýaby bireý-aq - Otarshyldyq. Otar boldyq. Moiyndamaimyz. Qazaqtyń uly denesine túsken qandy jarany kórsek te kórmegendei bolamyz. Jasyrdyq. Endi ólip baramyz. Dymymyz shyqpai ólip baramyz. Biz de syn da joq, uiat ta joq. Óitkeni "Qus ilgen qýda syn joq uiatpen". Qairan Mahambet!
Imperiianyń qos basty Qusy ilgen Qazaq qýda syn da joq, uiat ta joq. Kúshiginde talanbaǵan, qustyń tyrnaǵy batpaǵan, "jalǵyz júrip ottamaityn, Aqqý qustyń tóresindei", sáni de saltanaty boiynda, boiyndaǵy qasieti men kiesin tógip almaǵan tekti urpaq kerek bizderge!
Ol úshin aýyr da bolsa moiyndap, qandy jaramyzdyń betine tuz seýip, qurym kigizdi otqa kúidirip basyp, Otarsyzdanýymyz kerek! Qorqa-qorqa boldyq. Shegimizge jettik. Ózekti Erge bir ólim. Alash anamyzdy satyp, arsyzdyqpen uiatsyzdyqtan, qorqaqtyq pen ezdikten kúnde ólgenshe, bir-aq ret óleiik! Bizge bir Alla jar bolsyn!
Omar Jálelulynyń feisbýktaǵy jazbasynan
