Parlament Senatynyń tóraǵasy Dariǵa Nazarbaeva palatanyń jalpy otyrysy men komitet otyrystaryna shaqyrtylatyn adamdardyń sanyn shekteýdi tapsyrdy, dep habarlaidy "Ult aqparat".
«Ózderińiz bilesizder, elde tótenshe jaǵdai jariialandy. Bul der kezinde qabyldanǵan ári óte qajetti shara. Osy qadamdardy jaqsy túsinemiz. Osyǵan bailanysty tiisti buiryqqa qol qoidym. Tótenshe jaǵdai kezeńinde barlyq issaparlar men josparly buqaralyq sharalarǵa tyiym salynady. Al zań shyǵarýshylyq jumys jalǵasady. Biz múmkindiginshe jalpy otyrys pen komitet otyrystaryna shaqyrtylatyn adamdardyń sanyn shekteýmiz kerek», - dedi D. Nazarbaeva.
Osy oraida ol qujattarǵa qatysty jumystardyń kóbisin qashyqtan júrgizýge bolatynyn, ol úshin tehnikalyq múmkindik bar ekenin atap ótti.
«Apparat qyzmetkerleriniń 70 paiyzdan astamy úiden jumys isteý rejimine aýysty, al qalǵandaryna qysqartylǵan jumys kúni belgilendi. Senat ǵimaratynda kúnine birneshe ret qajetti sanitarlyq-epidemiologiialyq jumystar júrgiziledi», - dedi D. Nazarbaeva.
«Bizge erteńgi kúnge senimmen qarap, boiymyzdaǵy úrei men kúdikten arylý qajet. Qazirgi tańda barshamyz bári jaqsy bolatyny týraly oilap, jaqsylyqtan úmittenýimiz kerek. Biz – talai synda shynyqqan myqty halyqpyz. Biz bárin jeńemiz. Aldaǵy senbi kúni jarqyn merekemiz Naýryz keledi. Bul – kóktem merekesi, jandaný men gúldený meiramy. Úmit pen jańarý merekesi. Barshańyzǵa densaýlyq pen bar jaqsylyqty tileimin! Naýryz bizge bul jyly tek baqyt alyp kelsin, qaiǵy men aýyrtpalyqtan aryltsyn!», - dedi Senat tóraǵasy.
