Botsvanada júzdegen pil mikroskopiialyq baldyrlardyń qurbany boldy. Biylǵy jyldyń mamyr-shilde ailarynda kóptegen janýarlardyń kenetten qyrylýynyń sebebin zerttegen mamandar osyndai qorytyndy shyǵardy, dep habarlaidy Bi-Bi-Si.
Reindjerler Okavango ózeniniń saǵasynda aerofototúsirilim kezinde pilderdiń kóptegen óleksesi anyqtalǵan soń dabyl qaqqan. Kýágerler tiri pilderdiń de birtúrli, bir jerdi ainalshyqtap júrgenin jáne álsiz kóringenin baiandady.
Botsvanada afrikalyq pilderdiń búkil popýliatsiiasynyń úshten bir bóligi tirshilik etedi. Bilik áýelde bul brakonerlerdiń isi dep sheshken, alaida taldaý qorytyndylary 330 pildiń sýda tirshilik etetin tsianobakteriialar, nemese kók-jasyl tústi baldyrlardan bólinetin toksinderden qyrylǵanyn kórsetti.
Tsianobakteriialar – aǵynsyz jyly sýdaǵy ýly bakteriialar. Olar sýdyń basqa túske boianýyna ákeledi. Qyrylǵan pilderdiń kóbi shaǵyn sý qoimalarynyń janynan tabyldy, alaida mamandar olardyń qyrylýyna tsianobakteriialar sebep bolǵanyna sene alǵan joq.
«Taldaý qorytyndylary boiynsha, pilderdiń qyrylýyna tsianobakteriialardan bólinetin neirotoksinder sebep áser etken. Bul bakteriialar sýda tirshilik etedi», - dep málimdedi dúisenbi kúni ótken baspasóz máslihatynda Bostvana jabaiy tabiǵat jáne ulttyq saiabaqtar departamentiniń bas sanitarlyq dárigeri Mmadi Rýben.
